TBİLİSİ, 4 aprel. TELEQRAF
“Diplomatik missiya nümayəndəsinin dövlətin daxili işlərinə qarışması beynəlxalq hüququn pozulmasıdır”.
Teleqraf-ın yerli bürosu xəbər verir ki, bunu Gürcüstan parlamentinin sədri Şalva Papuaşvili keçirdiyi brifinqdə deyib.
O, Fransa və digər ölkələrin Gürcüstandakı səfirlərini parlament binasına hücumları pisləməyə dəfələrlə çağırdığını bildirib.
“Bu günə qədər nə Fransa, nə də digər ölkələrin səfirləri Tbilisidə keçirilən aksiyalar zamanı Gürcüstan parlamentinin binasına hücumları qınamayıblar. Sonuncu hücum martın 31-də baş verib və binaya zədələr yetirilib. Ötən ilin dekabrında isə parlamentə hücumlar nəticəsində binaya yarım milyon lari dəyərində zərər vurulub. Təəssüflər olsun ki, heç kəs hücumları pisləmir, əksinə, zorakılığın təşviqi aparılır”, - Ş.Papuaşvili deyib.
Spiker bütün səfirləri “Diplomatik əlaqələr haqqında” Vyana Konvensiyası çərçivəsində qalmağa və ev sahibi olan ölkənin daxili işlərinə qarışmamağa çağırıb.
Qeyd edək ki, Fransanın Gürcüstandakı səfiri Şeraz Qasri qonşu ölkədəki etirazları dəstəklədiyini açıq şəkildə bəyan edir. O, hakimiyyəti “repressiyaları” dayandırmağa və aksiyalarda saxlanılanları azad etməyə çağırır.
