TBİLİSİ, 4 aprel. TELEQRAF
Gürcüstanın Tbilisi, Lançxuti və Batumi şəhərlərində həyata keçirilmiş əməliyyat-axtarış tədbirləri nəticəsində “oğru dünyası” ilə əlaqəli 13 nəfər saxlanılıb.
Teleqraf-ın yerli bürosu xəbər verir ki, bu barədə Gürcüstanın Daxili İşlər Nazirliyindən bildirilib.
Məlumata əsasən, həmin şəxslərdən biri “qanuni oğru” olmaqla ikisinə ittihamlar irəli sürülüb.
İstintaqla müəyyən olunub ki, saxlanılanlar “qanuni oğru” adlandırılan şəxslərlə əlaqədə olublar və “oğru dünyası”nın fəaliyyətində fəal iştirak ediblər.
Təqsirləndirilən şəxslərin üzərilərinə və evlərinə keçirilmiş baxış zamanı kompüter avadanlığı və mobil telefonlar, odlu və soyuq silahlar, patronlar, partlayıcı qurğular, narkotik vasitə olan “marixuana” və pul vəsaitləri maddi sübut kimi müsadirə edilib.
İstintaq tədbirləri davam etdirilir. Törədilmiş cinayət əməllərinə görə 15 ilədək azadlıqdan məhrum etmə cəzası nəzərdə tutulub.
