BAKI, 3 aprel. TELEQRAF

"İran ümid edir ki, Ermənistan və Azərbaycan təmkinlə nəticədə iki ölkə arasında sülh sazişinin imzalanmasına gətirib çıxaracaq yolu tutacaq".

Teleqraf xəbər verir ki, bunu İranın Ermənistandakı səfiri Mehdi Sübhani İrəvanda jurnalistlərə açıqlamasında deyib.

“Ümid edirik ki, hər iki tərəf təmkinlə sülh sazişinin imzalanmasına səbəb olacaq yolla gedə biləcək. Məncə, regionumuz heç bir gərginliyə tab gətirməyəcək. Ümid edirik ki, bütün tərəflər sülh və əmin-amanlığa yönəlmiş bu prinsipləri dəstəkləyəcək”, - səfir qeyd edib.

Sübhani əlavə edib ki, İran Ermənistan və Azərbaycanla təmasdadır:

“Söhbətlərimiz və müzakirələrimiz zamanı tərəfləri sülh sazişinin imzalanması istiqamətində irəliləməyə çağırırıq. İran sülhün qorunub saxlanmasına, atəşkəsin pozulmamasına və tərəflərin sülh razılaşmasına nail olmasına kömək etməyə hazırdır. Hesab edirəm ki, bu baxımdan 3+3 kifayət qədər yaxşı formatdır. Bu formatdan istifadə etməklə biz sülhün bərqərar olmasına doğru irəliləyə bilərik”.