BAKI, 6 noyabr. TELEQRAF

Serbiyanın Respublika Seçki Komissiyası oktyabrın 25-də keçirilmiş növbədənkənar parlament seçkilərinin yekun nəticələrini rəsmən təsdiqləyib.

Teleqraf xəbər verir ki, bu barədə ölkənin Respublika Seçki Komissiyası məlumat yayıb.

Rəsmi nəticələrə əsasən, “Tələbə siyahısı – Tələbələr qalib gəlir” seçki bloku 2 milyon 354 min 417 səs toplayaraq 250 yerlik parlamentdə 140 mandat qazanıb. Bununla da blok hökuməti müstəqil formalaşdırmaq üçün zəruri olan 126 mandat həddini keçib.

Serbiyanın keçmiş prezidenti Aleksandar Vuçiçin “Birləşmiş Serbiya” seçki bloku isə 1 milyon 731 min 323 səslə 103 deputat mandatı əldə edib.

Voyevodina Macarları İttifaqı və Alban Koalisiyası parlamentdə hərəyə iki mandatla təmsil olunacaq. Digər üç mandat isə Rasim Lyayiçin Sosial Demokrat Partiyasının, Sancak Demokratik Fəaliyyət Partiyasının və Usame Zukorliçin Birləşmə Hərəkatının nümayəndələrinə veriləcək.

Qanunvericiliyə əsasən, yeni parlament seçkilərin yekun nəticələrinin elan edilməsindən sonra 30 gün ərzində ilk iclasını keçirməlidir. Deputatların səlahiyyətləri təsdiqləndikdən və parlament formalaşdıqdan sonra yeni hökumətin yaradılması üçün 90 gün vaxt nəzərdə tutulur.