TBİLİSİ, 2 aprel. TELEQRAF
Gürcüstan parlamenti ölkə qanunvericiliyindən “gender” termininin çıxarılması ilə bağlı dəyişiklikləri dəstəkləyib.
Teleqraf-ın yerli bürosu xəbər verir ki, qanun layihəsinin lehinə 81 deputat səs verib.
Dəyişikliklərə əsasən, “Gender bərabərliyi” haqqında qanunun adı “Kişi və qadın bərabərliyi” haqqında qanuna dəyişdirilib.
Gürcüstan qanunvericiliyindən “gender mənsubiyyəti” termini də çıxarılacaq, “gender məsələləri” ifadəsi “kişi və qadınların bərabərliyi məsələləri”, “gender dözümsüzlüyü” ifadəsi isə “kişi və qadınların bərabərliyinə dözümsüzlük” ifadələri ilə əvəzlənəcək.
Qeyd edək ki, Gürcüstanda “Gender bərabərliyi” haqqında qanun 2010-cu ilin martında qəbul olunub. Qanun əmək bazarında bərabərliyin yaradılması və qadınların ölkənin siyasi həyatında iştirakının artırılması mexanizmlərini tənzimləyir.
