BAKI 16 oktyabr. TELEQRAF

“İran və Qərb ölkələri arasında son danışıqların nəticələri qarşı tərəfin rasional dialoqa inanmadığını ortaya qoyur, müzakirələr nüvə məsələsindən kənara çıxaraq, İrana əlavə məhdudiyyətlər tətbiq etmək cəhdlərini əhatə edir”.

Teleqraf xəbər verir ki, bunu İranın Xarici Əlaqələr üzrə Strateji Şurasının rəhbəri və keçmiş xarici işlər naziri Kamal Xərrazi deyib.

Xərrazi raket və proksi qüvvələrlə bağlı məsələlərin müzakirə mövzusu olmadığını, İranın bu mövzuda danışıqlara girməyi qəbul etməyəcəyini bildirib.

O əlavə edib ki, Tehranın heç bir diktəyə tabe olmayan ilkin danışıqlara hazır olduğunu açıq şəkildə nümayiş etdirməkdən başqa yolu yoxdur: “İranın dialoq heyəti həmişə danışıqlar meydanında qalmağa və ondan geri çəkilməməyə çalışıb”.

Xərrazi qeyd edib ki, İran Prezidenti Məsud Pezeşkian və xarici işlər naziri Abbas Əraqçinin sentyabrda Nyu-Yorka səfəri zamanı nəzərəçarpacaq nəticələrə gətirib çıxaracaq danışıqların aparılması üçün intensiv cəhdlər edilib, amma qarşı tərəf bunu rədd edib.