BAKI, 2 aprel. TELEQRAF

“Qələbəni unudub qarşıdakı çempionat oyununa hazırlaşacağıq”.

Teleqraf xəbər verir ki, bunu "Araz-Naxçıvan"ın baş məşqçisi Elmar Baxşıyev evdə "Qarabağ"ı 1:0 hesabı ilə məğlub etdikləri Azərbaycan Kubokunun yarımfinal mərhələsinin ilk oyunundan sonra mətbuat konfransında deyib.

45 yaşlı mütəxəssis maraqlı oyunun alındığını bildirib: “Hər iki komanda yaxşı mübarizə apardı. Bizi nəyin gözlədiyini bilirdik. Komandam ortaya yaxşı iş qoydu. Qələbə qazandıq. Bunu unudub, qarşıdakı çempionat oyununa hazırlaşacağıq”.

Baş məşqçi kubok oyunlarında növbəti dəfə penaltidən fərqlənməklərini belə şərh edib: “Hər epizodları dəyərləndirsək, hakimlərin verdiyi qərardır və bizim müzakirəmizə ehtiyac yoxdur. Düşünürəm ki, təsadüfdür. Futbolun içində olan elementdir. Ümumi götürəndə, daha çox penaltini yox, komandanın meydançada verdikləridir”.

O, komandasının minimal hesablı qələbə ilə üstünlük qazanmadığını vurğulayıb: “Məğlub olsaydıq da, üstünlüyümüz və əskikliyimiz olmayacaqdı. Kimə qarşı oynadığımızı bilirik. “Qarabağ” oturuşmuş və reklama ehtiyacı olmayan komandadır. Bu matçı unudaraq çempionata köklənmək lazımdır. Vaxtı gələndə cavab oyununa köklənəcəyik”.

Elmar Baxşıyev start heyətdə etdiyi dəyişikliklər barədə danışmaq istəməyib: “Seçim mənə məxsusdur və buna görə açıqlama vermək fikrində deyiləm”.