BAKI, 15 avqust. TELEQRAF
İsveçrədə dondurulmuş Rusiya aktivlərinin həcmi 2026-cı ilin iyun ayına olan məlumata görə, bir il əvvəlki 7,4 milyard frankla müqayisədə 8,5 milyard İsveçrə frankına (10,4 milyard dollar) yüksəlib.
Teleqraf xəbər verir ki, bu barədə "TASS"ın sorğusuna İsveçrənin İqtisadi İşlər üzrə Dövlət Katibliyinin (SECO) rəsmi nümayəndəsi Fabian Mayenfiş deyib.
O, bildirib ki, 1 iyun 2026-cı il tarixinə İsveçrədə 8,5 milyard İsveçrə frankı dəyərində maliyyə aktivləri dondurulub.
Maliyyə aktivləri ilə yanaşı, sanksiyalara məruz qalan fiziki və hüquqi şəxslərə məxsus 14 daşınmaz əmlak, eləcə də idman və lüks avtomobillər, sənət əsərləri, mebel və musiqi alətləri sanksiya məhdudiyyətləri altında qalır.
Rusiya Mərkəzi Bankının ehtiyatları və aktivləri də İsveçrədə dondurulub. Onların həcmi 2026-cı ilin iyun ayına olan məlumata görə, bir il əvvəl 7,2 milyard frankla müqayisədə 6,8 milyard İsveçrə frankı (8,3 milyard dollar) təşkil edib.
Mayenfiş, İsveçrənin dondurulmuş Rusiya aktivlərinin gələcəkdə Ukraynanın maraqları naminə istifadəsi üçün "Euroclear"dan yeni Aİ depozitariyasına köçürülməsi təşəbbüsünün müzakirəsində iştirak edib-etməməsi sualına cavab verməyib.
Eyni zamanda, o, İsveçrənin Rusiya Mərkəzi Bankının dondurulmuş aktivləri ilə bağlı beynəlxalq müzakirələri diqqətlə izlədiyini bildirib.
SECO nümayəndəsinin sözlərinə görə, Bern üçün beynəlxalq səviyyədə razılaşdırılmış yanaşmaların qanunun aliliyi və beynəlxalq hüquq prinsiplərinə uyğun olması, eləcə də maliyyə sabitliyini təmin etməsi son dərəcə vacibdir.
