BAKI, 2 aprel. TELEQRAF

Rusiya Ukraynanın Donetsk vilayətinin Liman şəhəri yaxınlığında çoxlu sayda hərbi qüvvə toplayıb və genişmiqyaslı hücuma hazırlaşır.

Teleqraf xəbər verir ki, bu barədə ABŞ-nin Müharibə Araşdırmaları İnstitutunun (ISW) təhlilində deyilir.

Rusiyanın Limanla yanaşı, Borovayanı ələ keçirməyə hazırlaşdığı bildirilir.

Həmçinin Rusiya ordusu bölgədə yerləşən Novolubovka kəndini işğal edərək, cənub-şərqə doğru irəliləyir.

ISW-nin məlumatına görə, bəzi ərazilərdə qüvvələrin nisbəti 10:1 Rusiyanın xeyrinədir.

Analitiklərin fikrincə, ruslar Limanın şimal-şərqindəki üstünlüyündən istifadə edərək Luqansk vilayətinin Ukraynanın nəzarətində qalan 1 faizini ələ keçirə və bölgənin işğalını tamamlaya bilər. Bu, Rusiyaya danışıqlar masasında mövqeyini gücləndirmək üçün lazımdır.