BAKI, 3 aprel. TELEQRAF

2024-cü ildə istismara verilən yeni kömür elektrik stansiyalarının tutumu son 20 ildə ən aşağı səviyyəyə düşüb.

Teleqraf xəbər verir ki, beynəlxalq vətəndaş cəmiyyəti təşkilatı Global Energy Monitorun dərc etdiyi “Yüksəliş və Tənəzzül” hesabatına əsasən, ötən il dünyada cəmi 44 giqavatlıq kömür elektrik stansiyası istifadəyə verilib. Bu, son 20 ildə qeydə alınan ən aşağı göstəricidir. Bununla yanaşı, 25,2 giqavatlıq kömür elektrik stansiyası bağlanıb və nəticədə qlobal kömür tutumu cəmi 18,8 giqavat artıb ki, bu da illik əsasda 1%-dən aşağı göstəricidir.

Son 20 ilin orta statistik göstəriciləri ilə müqayisədə, 2024-cü ildə istifadəyə verilən yeni kömür elektrik stansiyalarının gücü təxminən 30 giqavat daha az olub.

Avropa İttifaqı ölkələrində kömürdən imtina prosesi sürətlənib. 2023-cü ildə 2,7 giqavatlıq kömür elektrik stansiyası bağlanmışdısa, 2024-cü ildə bu göstərici 11 giqavata yüksəlib. Almaniya 6,7 giqavatlıq kömür stansiyasını bağlayaraq bu yöndə lider olub. Böyük Britaniya isə tamamilə kömürdən imtina edib.

ABŞ-də ötən il 4,7 giqavatlıq kömür elektrik stansiyası bağlanıb ki, bu da son on ildə qeydə alınan ən aşağı göstəricidir. ABŞ hökuməti 2035-ci ilə qədər mövcud kömür tutumunun yarısını bağlamağı planlaşdırır, lakin bəzi enerji şirkətləri bu prosesi ləngidir.

Hesabata əsasən, Türkiyə son illərdə 92 giqavatdan çox kömür elektrik stansiyası layihəsini ləğv edib. Bu rəqəm hazırda ölkədə fəaliyyət göstərən kömür elektrik stansiyalarının gücündən beş dəfə çoxdur.

Qlobal miqyasda kömür elektrik stansiyalarının azalmasına baxmayaraq, Çin və Hindistan bu tendensiyadan kənarda qalır. 2024-cü ildə Çin rekord sayda yeni kömür elektrik stansiyalarının tikintisinə başlayıb.

Hindistan da ötən il rekord sayda yeni kömür elektrik stansiyası istifadəyə verib. Hökumət gələcəkdə kömürdən istifadənin azaldılacağını bildirsə də, bunun nə vaxt həyata keçiriləcəyi barədə dəqiq cədvəl açıqlamayıb.