BAKI, 2 aprel. TELEQRAF
İsrailin müdafiə naziri İsrael Katz Qəzza zolağında əməliyyatları genişləndirdiklərini açıqlayıb.
Teleqraf xəbər verir ki, o, bölgənin HƏMAS-dan təmizlənənədək və girovlar azad olunanadək əməliyyatların davam edəcəyini deyib.
“Qoşunlar Qəzza və buradakı infrastrukturu terrorçulardan təmizləmək, İsrailin təhlükəsizlik bölgələrinə əlavə olunacaq geniş əraziləri ələ keçirmək üçün hərəkətə keçib”, - Katz bildirib.
İsrail müdafiə naziri həmçinin qəzzalıları HƏMAS-ı devirmək və bütün girovları geri qaytarmaq üçün indi hərəkətə keçməyə çağırıb.
Katzın açıqlamasından sonra İsrail Müdafiə Qüvvələrinin Qəzzada daha bir diviziyasının yerləşdirildiyi də açıqlanıb.
Fələstin tərəfinin verdiyi məlumata görə, İsrailin dünən Qəzzanın cənub şəhərinin bütövlükdə boşaldılması əmri verməsindən sonra İsrail quru qüvvələri Rəfahın bəzi bölgələrində əməliyyatlara başlayıb.
İsrail dünən Rəfahla yanaşı, Xan Yunis üçün də təxliyə xəbərdarlığı edib. Fələstin gecə boyu hər iki şəhərə İsraildən hava zərbələrinin artdığını bəyan edib.
