BAKI, 24 sentyabr. TELEQRAF

Özbəkistan Prezidenti Şavkat Mirziyoyev Nyu-Yorkda BMT Baş Assambleyasının 80-ci sessiyası çərçivəsində BMT Baş katibi Antonio Quterreş ilə görüşüb.

Teleqraf xəbər verir ki, görüşdə dayanıqlı inkişaf məqsədlərinə nail olmaq üçün milli vəzifələrin icrası çərçivəsində BMT ilə əməkdaşlığın daha da genişləndirilməsi məsələlərinə baxılıb.

Özbəkistanla BMT arasında tərəfdaşlığın görünməmiş səviyyəyə çatması məmnunluqla qeyd olunub. 160-dan çox proqram və layihə uğurla həyata keçirilir. Oktyabrda yeni beşillik əməkdaşlıq proqramının imzalanması gözlənilir.

Son illər Özbəkistanın təşəbbüsü ilə BMT Baş Assambleyasının 13 qətnaməsi qəbul edilib. Özbəkistan ECOSOC, İnsan Hüquqları Komitəsi, Statistika Komissiyası kimi nüfuzlu strukturlara üzv seçilib.

Özbəkistanın təşəbbüsü ilə sabah BMT-nin mənzil-qərargahında uşaq xərçəngi və digər ağır xəstəliklərlə mübarizə üzrə yüksək səviyyəli forum keçiriləcək. Səmərqənd şəhərində YUNESKO-nun 43-cü Baş Konfransına intensiv hazırlıq gedir.

Söhbət zamanı aktual beynəlxalq və regional problemlər ətrafında da fikir mübadiləsi aparılıb.

Görüşün sonunda prioritet istiqamətlər üzrə geniş əsaslı tərəfdaşlığın inkişaf etdirilməsi, yeni əməkdaşlıq proqram və layihələrinin hazırlanması razılaşdırılıb.