BAKI, 23 dekabr. TELEQRAF

Türkiyənin Kayseri şəhərində Azərbaycan incəsənətinin təbliği məqsədi ilə maraqlı konsert proqramı təqdim olunub.

Teleqraf xəbər verir ki, Türkiyədəki Səfirliyimizin nəzdindəki Azərbaycan Mədəniyyət Mərkəzinin layihəsi, Şuşa Azərbaycan Evi və Kayseri Universitetinin dəstəyi ilə Kayseri Universitetinin ev sahibliyində keçirilən tədbir Dünya Azərbaycanlılarının Həmrəyliyi Günü və Yeni il bayramına həsr olunub.

Tədbirdə çıxış edən Azərbaycan Mədəniyyət Mərkəzinin direktoru Samir Abbasov Dünya Azərbaycanlılarının Həmrəyliyi Gününün dünyanın müxtəlif bölgələrində yaşayan azərbaycanlılar arasında birlik və həmrəyliyi möhkəmləndirən mühüm bir tarix olduğunu vurğulayıb.

Samir Abbasov çıxışında Azərbaycan türklərinin həmrəyliyinin təkcə milli məna daşımadığını, eyni zamanda bütün türk dünyasının birlik və bərabərliyinə töhfə verən güclü bir amil olduğunu qeyd edib. O, Azərbaycan-Türkiyə tarixi dostluğu və qardaşlıq münasibətini vurğulayaraq, Azərbaycanın zəngim mədəniyyəti və incəsənətinin Türkiyədə tanıdılması istiqamatində görülən işlər barədə danışıb.

Proqram çərçivəsində təqdim olunan bədii çıxışlar tamaşaçılar tərəfindən böyük maraqla qarşılanıb. Azərbaycan və Özbəkistanın Xalq artisti Gülyanaq Məmmədova, Rəşid Behbudov adına Dövlət Mahnı Teatrının solisti Fəxri Kazım Nicat, opera sənətçisi Fidan Hüseynova xalq mahnılarımızı ifa ediblər.

Azərbaycan Mədəniyyət Mərkəzinin “Azərbaycan Rüzgarı” Muğam Poeziya Qrupu və “Zəngəzur” Azərbaycan Xalq Rəqsləri Ansamblının səhnə çıxışları Azərbaycan muğamları, milli rəqslərimizin ifası maraqla qarşılanıb.