BAKI, 18 avqust. TELEQRAF

2026-cı il dövlət büdcəsinin gözlənilən daxilolmalarının hesablanması zamanı Azərbaycan qazının bütün istiqamətlər üzrə 1 000 kubmetrinin orta satış qiyməti 35 ABŞ dolları artırılaraq 296 ABŞ dolları müəyyən edilib.

Teleqraf xəbər verir ki, bu barədə Maliyyə Nazirliyinin "2026-cı ilin dövlət və icmal büdcələrinin yarımillik icrasına dair arayış və ilin sonuna gözləntilər" sənədində qeyd olunub.

Məlumata görə, qiymət artımı ilə əlaqədar Şahdəniz layihəsi üzrə hasilatın pay bölgüsü sazişləri çərçivəsində fəaliyyət göstərən podratçı təşkilatların mənfəət vergisi daxilolmalarının 400 milyon manat və ya 25 faiz artacağı gözlənilir.

2026-cı ilin dövlət büdcəsində vergi orqanlarının xətti ilə qeyri-neft-qaz sektoru üzrə daxilolmalar 13 milyard 510 milyon manat gözlənilir ki, bu da cari il üçün təsdiq olunmuş göstərici ilə müqayisədə 200 milyon manat və ya 1,5 faiz çoxdur.