BAKI, 3 iyul. TELEQRAF

ABŞ Prezidenti Donald Tramp İranla aparılan danışıqlarda Vaşinqtonun qarşıya qoyduğu məqsədlərin böyük hissəsinin artıq yerinə yetirildiyini bildirib.

Teleqraf xəbər verir ki, Donald Tramp bu barədə CNBC telekanalına müsahibəsində danışıb.

“Biz danışıqlar aparırıq. Mənə elə gəlir ki, onlar bizə lazım olan demək olar ki, bütün şərtlərlə razılaşıblar”, - ABŞ lideri qeyd edib.

Tramp eyni zamanda vurğulayıb ki, onun İranla uzun illər davam edə biləcək hərbi kampaniya aparmaq niyyəti yoxdur.

Aparıcının onu ABŞ-ni yeni “əbədi müharibə”yə sürükləməyən praqmatik siyasətçi kimi xarakterizə etməsinə cavab verən Tramp bununla razılaşdığını bildirib.

ABŞ Prezidenti qeyd edib ki, ölkəsi uzun illər müxtəlif müharibələrdə iştirak edib və belə təcrübələrin təkrarlanmasını istəmir.

“Vyetnamda 19 il, Əfqanıstanda təxminən 10 il qaldıq. Koreya müharibəsi də uzun illər davam etdi. Mən isə hakimiyyətdə cəmi dörd aydır ki, varam”, - deyə Tramp vurğulayıb.

O, həmçinin ABŞ-nin İran qarşısında hərbi baxımdan üstünlük əldə etdiyini iddia edib.

Qeyd edək ki, ABŞ və İran arasında İsveçrənin Bürgenştok kurortunda Qətər və Pakistanın vasitəçiliyi ilə keçirilən danışıqlarda tərəflər arasında bir sıra məsələlər üzrə irəliləyiş əldə olunduğu bildirilmişdi. Birgə bəyanatda görüşlərin konstruktiv atmosferdə keçdiyi və texniki məsləhətləşmələrin davam etdirilməsi üçün zəmin yarandığı qeyd olunmuşdu.