BAKI, 13 may. TELEQRAF

ABŞ Prezidenti Donald Tramp Pakistanın İranla dialoqda başqa bir vasitəçi ilə əvəz edilməsi ilə bağlı təklifləri rədd edib.

Teleqraf xəbər verir ki, Tramp Çinə dövlət səfərinə yola düşməzdən əvvəl Ağ Evin həyətində jurnalistlərə bununla bağlı bildirib.

"Xeyr. Onlar möhtəşəmdirlər. Pakistanlılar möhtəşəm işlər görürlər. Feldmarşal və Pakistanın Baş naziri tamamilə möhtəşəm işlər görürlər", - deyə Amerika lideri qeyd edib.

"CBS News"un 11 mayda verdiyi məlumata görə, İran ABŞ-nin potensial hücumlarından qorunmaq üçün Pakistan və Əfqanıstana hərbi və mülki təyyarələr yerləşdirmiş ola bilər. İddia edilir ki, İran hərbi təyyarələri İslamabadın cənubundakı Pakistanın Nur Xan Hərbi Hava Qüvvələri Bazasına yerləşdirilib. İddialara görə, orada kəşfiyyat missiyaları üçün dəyişdirilmiş C-130 hərbi nəqliyyat təyyarəsi var.