BAKI, 31 yanvar. TELEQRAF

Türkmənistan 2026-cı ildə MDB-yə sədrliyi üçün strateji konsepsiya təqdim edib.

Teleqraf xəbər verir ki, bu barədə Türkmənistanın Belarusdakı səfiri Nazarqulu Şaquliyev bildirib.

Diplomat deyib ki, bu dövrdə sülh, neytrallıq və ölkələr arasında etimadın gücləndirilməsi prioritet olacaq.

Aşqabad 2027-ci ili MDB-də “Nəqliyyat Əlaqəsi İli” elan etməyi təklif edib. Ölkə regionun rəqabət qabiliyyətini artırmaq üçün nəqliyyat dəhlizləri, rəqəmsal infrastruktur və innovativ layihələri inkişaf etdirməyi planlaşdırır.

Siyasi sahədə Türkmənistan beynəlxalq hüququn qorunması üçün əlaqələndirilmiş tədbirlərin tərəfdarıdır və BMT-də MDB ölkələri üçün vahid diplomatik mövqe hazırlamağı təklif edib. Aşqabad həmçinin 2028-ci ili “Beynəlxalq Hüquq İli” elan etmək təşəbbüsünü irəli sürməyi planlaşdırır.

Konsepsiyanın humanitar komponenti gənclər mübadiləsi, idman, çoxdillilik, ətraf mühitin mühafizəsi, yaşıl iqtisadiyyat və elmi-texniki əməkdaşlığı əhatə edir.