BAKI, 18 aprel. TELEQRAF
Tədqiqatçılar vaxtilə Marsda həyatın olub-olmadığını öyrənməyə bir addım daha yaxındırlar.
Teleqraf xəbər verir ki, elm adamları mineralların planetin dərinliyində əmələ gəldiyinə dair inandırıcı sübutlar tapıblar.
Avstraliyanın Kvinslend Texnologiya Universitetindən Maykl Cons deyib:
“Sulfat mineralları Marsın bir çox bölgəsində müxtəlif həcmdə su ilə birlikdə tapılır, bu, suyun planetdə necə hərəkət etdiyini anlamağa kömək edir. Bu, Marsın vaxtilə yaşamaq üçün yararlı olub-olmadığını anlamaq üçün açardır. Amma bu mineralların necə və nə vaxt əmələ gəldiyini hələ tam anlaya bilməmişik.
Komandamız Marsın dərinliyində tapılan mineralların daxili kristal quruluşunu öyrənmək üçün bir yol tapıb”.
Cons tədqiqatın həmmüəllifidir, onun araşdırması “Science Advances” elmi jurnalında dərc olunub.
Tədqiqatın müəllifləri sübutları tapmaq üçün NASA-nın “Perseverance” roverinin məlumatlarından istifadə ediblər. Rover 2021-ci ilin fevral ayından qırmızı planetin Jezero kraterini tədqiq edir, ibtidai mikrob həyatının izlərini tapmaq ümidi ilə torpaq nümunələri toplayır.
Komanda yeni üsul və roverin məlumatlarından istifadə edərək, kristal strukturlarının oriyentasiyasını təyin edərək, Mars minerallarının necə və nə vaxt, eləcə də hansı şəraitdə əmələ gəldiyini göstərən izləri əldə edə bilib.
“Jezero kraterinin bir bir hissəsində, dərinlikdə iki nəsil kalsium sulfat mineralları əmələ gəlib”, - Cons qeyd edib.
Bu kəşf Marsın keçmişində mövcud olmuş mühitlərin müxtəlifliyini vurğulayır. Bu, Marsda həyatın mümkün olması üçün çoxsaylı potensial imkanlara işarə edir.
