BAKI, 6 oktyabr. TELEQRAF

Ermənistan Baş naziri Nikol Paşinyan naməlum şəraitdə ölkəsinə keçən Azərbaycan əsgərinin Bakıya ekstradisiya edilib-edilməyəcəyi ilə bağlı suala birbaşa cavab verməkdən imtina edərək, məsələ barədə oktyabrın 8-də danışacağına eyham vurub.

Teleqraf xəbər verir ki, sualı cavabsız qoyan baş nazir cümə axşamı brifinq keçirəcəyini bildirib.

Nikol Paşinyanın suala cavabı belə olub: “Cümə axşamı brifinqimiz var”.

Təkrar əsgərin ekstradisiya edilib-edilməyəcəyi ilə bağlı artıq qərar verilib-verilmədiyi soruşulduqda Ermənistan Baş naziri yenə cavab verməyərək, jurnalistlərdən uzaqlaşıb.

Baş Prokurorluğun Mətbuat xidməti oktyabrın 1-də bəyan edib ki, 26 sentyabr 2026-cı il tarixində Nəsimi Musayevin xidmət yerində olmaması və olduğu yerin müəyyən edilməməsi ilə əlaqədar onun axtarışına başlanılıb, Müdafiə Nazirliyi və Fövqəladə Hallar Nazirliyinin aidiyyəti qüvvələri tərəfindən zəruri axtarış tədbirləri həyata keçirilib.

Bununla yanaşı, hadisənin hallarının araşdırılması məqsədilə Hərbi Prokurorluqda müvafiq araşdırma aparılmış və araşdırma nəticəsində Nəsimi Musayevin hərbi hissəni özbaşına tərk etməsinə əsaslı şübhələr müəyyən edilib.

Araşdırma zamanı toplanmış materiallar əsasında Hərbi Prokurorluğun İstintaq idarəsində Cinayət Məcəlləsinin müvafiq maddəsi ilə cinayət işi başlanılıb, hazırda iş üzrə zəruri istintaq və digər prosessual hərəkətlər davam etdirilir.

Həyata keçirilən tədbirlər nəticəsində Nəsimi Musayevin Ermənistan Respublikasının ərazisində olduğu və həmin ölkənin aidiyyəti orqanları tərəfindən saxlanıldığı müəyyən edilib.

Hazırda Nəsimi Musayevin Ermənistan Respublikası ərazisində olması, saxlanılması, habelə hadisənin digər hallarının aydınlaşdırılması məqsədilə Azərbaycan Respublikasının aidiyyəti dövlət qurumları tərəfindən qarşı tərəfin müvafiq qurumları ilə zəruri təmaslar davam etdirilir.

Cinayət işi üzrə istintaqın gedişi və nəticələri barədə qanunvericiliyin tələblərinə uyğun olaraq ictimaiyyətə əlavə məlumat veriləcəkdir.