BAKI, 10 mart. TELEQRAF

Ermənistan 5 aya yaxındır ki, erməniəsilli Ağasyan Vera Varaşakovnanın meyitinin təhvil alınmasına heç bir münasibət bildirmir.

Teleqraf xəbər verir ki, bunu Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən İtkin Düşmüş Şəxslər üzrə Beynəlxalq Komissiyanın (İCMP) Azərbaycan Respublikasında itkin düşmüş şəxslərin axtarışı üzrə qiymətləndirmə hesabatının təqdimatında Dövlət Təhlükəsizliyi Xidməti rəisinin müavini general-leytenant Şərafət Həsənov deyib.

Onun sözlərinə görə, 1954-cü il təvəllüdlü, erməniəsilli Ağasyan Vera Varaşakovnanın 20.10.2024-cü ildə Xankəndi şəhərində yaşadığı ünvanda xəstəlikdən vəfat etməsi ilə bağlı Beynəlxalq Qızıl Xaç Komitəsinin vasitəçiliyi ilə Ermənistan tərəfinin və onun övladlarının məlumatlandırılmasına, meyitinin təhvil verilməsi üçün bütün zəruri sənədləşmə işlərinin aparılmasına, hətta cari ilin fevral ayında vasitəçilərin iştirakı olmadan sərhəddə keçirilmiş görüş zamanı məsələ Ermənistanın nümayəndə heyətinin birbaşa diqqətinə çatdırılmasına baxmayaraq, Ermənistan meyitin təhvil alınmasına heç bir münasibət bildirmir.

O bildirib ki, bütün bunlar Ermənistan tərəfinin itkinlər və əsir-girovlar məsələsində qeyri-konstruktiv, qeyri-humanist mövqe sərgilədiyinin göstəricisidir.

General-leytenant qeyd edib ki, Azərbaycan 2020-ci ildə 44 günlük Vətən müharibəsindən sonra Ermənistana əməkdaşlıq nümunəsi göstərib: "Erməni tərəfi bizim ərazilərdə özlərinə aid meyitlərin axtarılması və aparılmasında heç bir çətinlik görmədi. Əksinə bu işdə onlara hərtərəfli dəstək göstərdik".