MİNGƏÇEVİR, 5 aprel. TELEQRAF
Respublikada ilk dəfə olaraq səhiyyə işçiləri arasında bölgələrdə başlayan marafon Xankəndidə yekunlaşacaq.
Teleqraf-ın yerli bürosunun məlumatına görə, "Sağlamlığa doğru qaç" devizi altında həyata keçirilən 5 kilometrlik qaçış marafonu Respublika Səhiyyə İşçiləri Həmkarlar İttifaqı Respublika Komitəsinin təşəbbüsü ilə gerçəkləşib.
Marafon Hacıqabul və Ağcabədidə başa çatdıqtan sonra sabah Mingəçevirdə davam edəcək.
Mingəçevir Şəhər Səhiyyə İşçiləri Həmkarlar İttifaqı Şurasının sədri Allahverdi Alıyev marafonun Azərbaycanın bir çox bölgələrində keçiriləcəyini bildirib. O, tədbirin Xankəndi şəhərində iyun ayının 8-də yekunlaşacağını vurğulayıb. Marafonun hər bir mərhələsində 6 regionun səhiyyə işçiləri iştirak edəcək və hər mərhələdə 3 qadın olmaqla 6 qalib müəyyən ediləcək və xatirə hədiyyələri ilə mükafatlandırılacaq.
Bu marafonun finalı Xankəndində keçiriləcək və bu tədbir mahiyyətinə xüsusi çalar qatacaq.
