BAKI, 22 sentyabr. TELEQRAF

Avropada təbii qazın qiyməti son üç həftənin ən aşağı səviyyəsinə enib.

Teleqraf xəbər verir ki, qazın qiyməti meqavat-saat üçün 70 avroya yaxınlaşıb.

Ucuzlaşmaya səbəb ABŞ-nin İran limanlarına tətbiq etdiyi blokadanı aradan qaldırması halında Hörmüz boğazının açılacağı yönündə xəbərlər təsir göstərib.

Yaponiyanın “Kyodo News” agentliyinin məlumatına görə, Tehran su yolunun yeddi gün ərzində açılmasını təklif edib. Bu, BMT Baş Assambleyasında diplomatik müzakirələr üçün əsas yarada bilər. Prezident Donald Trampın Baş Assambleyada çıxış etməsi və İran Prezidenti Məsud Pezeşkianla görüşməsi gözlənilir.

Alternativ marşrutlardan istifadə edən LNG tankerlərinin və xam neft daşıyan gəmilərin sayının artması da təchizatla bağlı narahatlıqları azaldıb. Bununla yanaşı, Şimal-Şərqi Asiyada, xüsusilə Çin, Yaponiya və Türkiyədə LNG-yə tələbat zəif olaraq qalır.

Avropada qarşıdakı iki həftə ərzində havanın daha isti və quraq olacağı gözlənilir.

Qaz anbarlarının doluluq səviyyəsi 69,94% təşkil edib. Bu göstərici sutka ərzində 0,31 faiz bəndi artıb, lakin ötən ilin eyni dövrü ilə müqayisədə 11,76 faiz bəndi aşağıdır.

Eyni zamanda, Norveçin qaz ixracı təmir işləri səbəbindən məhdud olaraq qalır. İxrac üçün sifarişlər sutkada 262,5 milyon kubmetrədək azalıb.