BAKI, 14 may. TELEQRAF

“Məktəblilərarası Milli Hakaton - 2025” müsabiqəsinin növbəti mərhələsində yarışacaq iştirakçıların siyahısı açıqlanıb.

Bu barədə Teleqraf-a Elm və Təhsil Nazirliyindən (ETN) məlumat verilib.

Bildirilib ki, ETN və “Rəqəmsal bacarıqlar” layihəsinin təşkilatçılığı ilə 22-25 aprel tarixlərində keçirilən seçim mərhələsində 15 000-dən çox şagirdin texnoloji və analitik bacarıqları müxtəlif tapşırıqlar vasitəsilə qiymətləndirilib:

"Nəticələrə əsasən 1640 şagird növbəti mərhələdə iştirak şansı qazanıb. Həmin iştirakçıların siyahısı codehour.edu.az saytında yerləşdirilib. dörd mərhələ və finaldan ibarət olan hakaton müddətində iştirakçılar test tapşırıqları, komanda işi və layihə hazırlığı kimi yaradıcı və innovativ fəaliyyətlərdə iştirak edəcəklər. III və IV mərhələlər 5 müxtəlif regionda təşkil ediləcək. Bu mərhələlərdə iştirakçılar üçün onların bilik və bacarıqlarının inkişafına töhfə verəcək maarifləndirici sessiya və seminarlar təşkil ediləcək".

Qeyd edək ki, müsabiqənin final mərhələsində isə 120 iştirakçıdan ibarət 30 komanda yarışacaq. Qalib komandaları dəyərli mükafatlar və xüsusi hədiyyələr gözləyir.