BAKI, 20 dekabr. TELEQRAF

Maliyyəçi Ceffri Epşteyn hazırkı ABŞ prezidenti Donald Trampdan 22.500 dollarlıq çek alıb.

Teleqraf xəbər verir ki, bu barədə materiallar ABŞ Ədliyyə Nazirliyinin veb saytında açıqlanıb. Fayllardan birində Epşteynin naməlum bir qadını qucaqladığı fotoşəkil var. Bu şəkildə maliyyəçinin əlində Tramp tərəfindən ona yazılmış 22.500 dollarlıq çek mövcuddur.

Fotoşəklin məzmunu barədə heç bir məlumat yoxdur və hazırkı ABŞ liderinin Epşteynə çeki hansı məqsədlə verdiyi məlum deyil.

ABŞ Ədliyyə Nazirliyi Epşteynin işinə dair təxminən 3965 fayldan ibarət bəzi materialları açıqlayıb və bunların əksəriyyəti fotoşəkillərdir. Ümumi məlumat həcmi 3 GB-dır. Materiallar dörd qrupa bölünüb. Bəzi fayllar tək şəkillər, digərləri isə çoxsəhifəli sənədlərdir.

Epşteyn 2002-2005-ci illər arasında onlarla yetkinlik yaşına çatmayan qızın Manhettendəki evinə və şəxsi adasına səfərlərinin təşkilində ittiham olunur. Müstəntiqlər dəvət olunmuş qızların ən kiçiyinin 14 yaşında olduğunu müəyyən ediblər. 2019-cu ilin avqust ayında maliyyəçi həbsxana kamerasında ölü tapılıb.

Daha əvvəl ABŞ Ədliyyə Nazirliyi Epşteyn işi çərçivəsində keçmiş ABŞ prezidentinin jakuzidə çəkilmiş fotosunu yayımlamışdı.