Türkiyə hakimiyyəti 2017-ci ildə Rusiyadan aldığı S-400 zenit-raket komplekslərini geri qaytarmaq niyyətindədir.

Teleqraf xəbər verir ki, “Bloomberg” nəşrinin məlumatına görə, Ankara bu addımı ABŞ ilə münasibətləri yaxşılaşdırmaq və F-35 qırıcılarını əldə etmək məqsədi ilə nəzərdən keçirir.

Məlumatda ABŞ-nin Türkiyədəki səfiri Tom Barrakın sözlərinə istinad edilir. O bildirib ki, Ankara S-400 sistemlərindən imtina etməyə yaxınlaşır.

Xatırladaq ki, daha əvvəl Rusiyanın xarici işlər naziri Sergey Lavrov səfirlərlə keçirilən dəyirmi masada Türkiyənin S-400-lərlə bağlı Moskva qarşısında müəyyən öhdəliklərinin olduğunu xatırlatmışdı.

Qeyd edək ki, iyun ayında Türkiyə Prezidenti Rəcəb Tayyib Ərdoğan Ankaranın Vaşinqtonla dialoqunda S-400 məsələsinin artıq bağlandığını bəyan etmişdi. Sentyabrda isə Türkiyə Müdafiə Nazirliyi Rusiyaya S-400-lərin geri qaytarılması ilə bağlı xəbərləri təkzib etmişdi.

Buna baxmayaraq, ABŞ səfiri Tom Barrak Türkiyənin Rusiya istehsalı olan S-400 zenit-raket komplekslərindən imtina istiqamətində addımlar atdığını iddia edir.