BAKI, 4 aprel. TELEQRAF
Cənubi Koreyada prezident dəyişikliyi Rusiya ilə münasibətlərin bərpası üçün yeni imkanlar aça bilər.
Teleqraf xəbər verir ki, bunu TASS-a müsahibəsində Avrasiya Strateji Araşdırmalar İnstitutunun direktoru Pak Hvan bildirib.
Onun sözlərinə görə, Yun-Sok Yolun üçillik prezidentliyi dövründə o, nə Rusiya prezidenti Vladimir Putinlə görüşüb, nə də Moskva ilə konstruktiv dialoq qurmağa cəhd edib.
Pak Hvan hesab edir ki, prezident beynəlxalq konteksti kifayət qədər anlamadığı üçün Rusiyaya qarşı lazımsız dərəcədə düşmənçilik siyasəti yürüdüb.
"Konstitusiya Məhkəməsinin prezident Yun Sok Yolun vəzifədən kənarlaşdırılması ilə bağlı qərarı Rusiya-Cənubi Koreya əlaqələrinin bərpası üçün yaşıl işıq yandırır", - Hvan vurğulayıb.
Qeyd edək ki, 4 aprel tarixində məhkəmə Yun Sok Yolun impiçmentini yekdilliklə təsdiqləyib. Yeni prezidentin seçkiləri 60 gün ərzində keçirilməlidir.
