BAKI, 23 sentyabr. TELEQRAF

“İranın Ermənistandakı səfirinin məntiqsiz açıqlamaları Tehran-Bakı münasibətlərində gərginlik yaradır”.

Teleqraf xəbər verir ki, bunu politoloq Elxan Şahinoğlu deyib.

“İranın Ermənistandakı səfiri Xəlil Şirqulami məntiqsiz açıqlamalarına birini də əlavə edib. İranlı diplomatın sözlərinə görə, bölgədə sabitliyə və davamlı sülhə nail olmaq üçün Ermənistan və Azərbaycan arasında “real güc balansı” təmin edilməlidir. “Bu olduqca vacibdir” deyən Şirqulami bildirib ki, İran regionda “yeni güc balansı”nın yaradılmasına çalışır və bu, “uzunmüddətli sülhün yeganə real təminatı”dır. Onun iddiasına görə, bu “balans” olmadan vəziyyət kövrək olaraq qalacaq, regionda sülhün təmin edilməsi üçün yalnız istək kifayət etmir. İran səfiri mövzunu bu cümlə ilə yekunlaşdırıb: “Bölgədə geosiyasi dəyişiklik qəbuledilməzdir. Bu, İranın fundamental mövqeyidir. Status-kvo mütləq qorunmalıdır”.

Status-kvonu yaradan və qoruyan Azərbaycandır. İranlı diplomatın “məntiq”inə görə, Azərbaycan Ermənistandan güclü olmamalı və ya Ermənistan Azərbaycan qədər güclü olmalıdır. Birincisi, iki ölkə arasında əhali nisbətini dəyişmək mümkün deyil. İkincisi, Tehran istəyir deyə Azərbaycan hərbi büdcəsini azaldıb Ermənistanınkı qədər edə bilməz. Səfirin başqa bir “məntiq”inə görə, Azərbaycanla Ermənistan arasında “güc balansı”nı qoruya biləcək ölkə İrandır”, - ekspert bildirib.

Elxan Şahinoğlu vurğulayıb ki, İranın Ermənistandakı səfiri hər dəfə statusunu və həddini aşan açıqlamalar verir: “O bu açıqlamaları ya özbaşına verir, ya da İran Xarici İşlər Nazirliyindən aldığı təlimatı həyata keçirir. Hər nədirsə, səfirin bu açıqlamaları İran-Azərbaycan münasibətlərinə əlavə gərginlik yaradır”.