BAKI, 4 aprel. TELEQRAF
Parlamentin müxalif “Ermənistan” və “Şərəfim Var” fraksiyaları Baş nazir Nikol Paşinyanın impiçmentini müzakirə edir.
Teleqraf xəbər verir ki, bu barədə “Hraparak” məlumat yayıb.
“İki müxalifət fraksiyası Nikol Paşinyanın impiçmentini müzakirə edir. Serj Sərkisyanın qanadı (“Şərəfim Var”) iddia edir ki, etimadsızlıq ifadə etməklə uğur qazanmaq və baş naziri vəzifədən uzaqlaşdırmaq olar, Robert Köçəryanın komandası (“Ermənistan”) bu ideyanı müsbət qarşılamır. Nəticədə iki komanda ortaq məxrəcə gələ bilmir”, - erməni nəşri bildirir.
Qəzetə danışan politoloq Mikayel Nahapetyan hazırda Paşinyanın vaxtından əvvəl hakimiyyətdən uzaqlaşdırılması üçün zəminin olmadığını deyib.
Ekspertin fikrincə, parlamentdəki müxalif siyasi qüvvələr arasındakı fikir ayrılığı bunu mümkünsüz edir:
“İmpiçment elan etməzdən əvvəl hamının, o cümlədən hakim “Vətəndaş Müqaviləsi” Partiyasının üzvlərinin fikri bir olmalıdır. Bu halda belə bir vəziyyət yarana bilər. Belə bir reallıq yaranarsa, böyük ehtimalla Paşinyanın özü də impiçmenti təşkil etməyə meylli olacaq. Burada vacib olan yeni siyasi status-kvodur, bunun üçün yeni siyasi reallıq lazımdır, amma indi durum belə bir reallıqdan uzaqdır”.
