BAKI, 2 aprel. TELEQRAF

Almaniya qoşunlarının Litvada Rusiya ilə sərhəddə yerləşdirilməsi siyasi baxımdan mühüm əhəmiyyət kəsb edir, bu, Avropanın birləşdiyini və ABŞ olmadan özünü müdafiə etməyə hazır olduğunu göstərir.

Teleqraf xəbər verir ki, bunu Ukrayna ordusunun “Aydar” batalyonunun keçmiş komandiri, hərbi analitik Yevgeni Dikiy deyib.

Ekspert bildirib ki, NATO-nun Avropa seqmentinin fəallaşması ABŞ-nin alyansdakı roluna yenidən baxıldığını açıqladıqdan sonra başlayıb.

Dikiyin fikrincə, Almaniya faktiki olaraq NATO-nun şərq cinahında ABŞ-ni əvəzləyir:

“NATO-nun Avropa seqmenti müstəqillik qazanmağa başlayır. Lazım gələrsə, Amerikasız hərəkət edə biləcəyini göstərir. Əslində, alman bölməsinin sərhəddə yerləşdirilməsi Rusiyaya Avropanın hələ də vahid olduğunu və lazım gələrsə, özünü birlikdə müdafiə edəcəyinə dair bir mesajdır. Almaniya bu prosesdə liderliyi öz üzərinə götürür. Bu, faktiki olaraq Almaniya üçün tarixi hadisədir”.

Analitik əlavə edib ki, 1945-ci ildən – İkinci Dünya müharibəsindən bəri ilk dəfədir alman qoşunları ölkədən kənarda yerləşdirilir.

“Politico” bundan əvvəl Almaniyanın Rusiya ilə həmsərhəd olan Litvada öz qoşunlarını rəsmən yerləşdirməyə başladığı barədə məlumat yayıb. Qeyd olunub ki, Almaniya aprelin 1-də İkinci Dünya müharibəsindən sonra ilk dəfə olaraq Baltikyanı ölkədə ilk daimi hərbi mövcudluğunu təmin edib. Söhbət 5 min nəfərlik zirehli briqadadan gedir. Nəşr yazıb ki, bu yolla Berlin Rusiyanın Ukraynaya qarşı müharibəsinə cavab olaraq NATO-nun şərq cinahını gücləndirməyə çalışır.