BAKI, 9 iyul. TELEQRAF
Amerikanın "Greenland Energy" şirkəti Qrenlandiyada neft kəşfiyyatına başlamaq niyyətində olduğunu açıqlayıb və ərazidə milyardlarla barel neft tapıla biləcəyini iddia edib.
Teleqraf xəbər verir ki, bu barədə şirkət nümayəndələri yerli sakinlərlə söhbətlərində bildiriblər.
Lakin Qrenlandiyanın Təbii Sərvətlər Nazirliyi şirkətin nə hazırlıq işləri, nə də kəşfiyyat qazması üçün etibarlı icazələrinin olmadığını bəyan edib. Hakimiyyət orqanları rəsmi təsdiq olmadan heç bir işin başlaya bilməyəcəyini vurğulayıblar.
ABŞ Prezidenti Donald Trampın Qrenlandiya üzərində nəzarətin qurulması zərurəti ilə bağlı açıqlamaları fonunda layihəyə maraq artır. Onun Qrenlandiya üzrə xüsusi nümayəndəsi, Luiziana qubernatoru Ceff Lendri əvvəllər ərazinin gündə 2 milyon barelə qədər neft hasil etmək qabiliyyətinə malik olduğunu iddia etmişdi.
"Greenland Energy" şirkəti geoloji kəşfiyyat lisenziyalarına Britaniyanın "80 Mile" şirkətinin sahib olduğu Jameson Land ərazisində iki kəşfiyyat quyusu qazmaq üçün təxminən 60 milyon dollar sərmayə qoymağı planlaşdırır. "Greenland Energy" şirkəti özü layihənin həyata keçirilməsinin Qrenlandiya hökumətindən icazələrin alınmasından asılı olduğunu etiraf edir.
Şirkətin planları təkcə siyasi deyil, həm də ekoloji səbəblərdən narahatlıq doğurur. Təklif olunan qazma sahəsi nadir quş növlərinin və dəniz tısbağalarının yaşadığı Ramsar Konvensiyası çərçivəsində qorunan ərazidə yerləşir. Ekoloqlar xəbərdarlıq edirlər ki, neft kəşfiyyatı regionun unikal ekosisteminə zərər verə bilər.
"Greenland Energy" şirkəti Trampın yaxın çevrəsinə bağlı investorlar və tərəfdaşlarla sıx işləyir.
