BAKI, 4 iyul. TELEQRAF
Meksika hakimiyyəti ölkənin şərqində yerləşən Verakrus ştatında aşkarlanan insan qalıqlarının iyunun əvvəlində qaçırılan jurnalist Roksana Qusmana məxsus olduğunu təsdiqləyib.
Teleqraf xəbər verir ki, Roksana Qusman kriminal xəbərlər yayımlayan “Pulso Informativo del Sureste” nəşrinin rəhbəri idi. O, iyunun 2-də silahlı və maskalı şəxslərin evinə basqın etməsindən sonra qaçırılmışdı. Hadisənin görüntüləri sosial şəbəkələrdə geniş yayılmışdı.
Yerli KİV-lərin məlumatına görə, cinayətkarlar jurnalisti qətlə yetirdikdən sonra onun meyitini yanacaq doldurulmuş çəlləklərdə məhv etməyə cəhd göstəriblər. Sonradan hadisə yerində skelet qalıqları aşkar edilib.
Verakrus Prokurorluğu bildirib ki, aparılan məhkəmə-tibbi ekspertiza nəticəsində qalıqların Roksana Qusmana məxsus olduğu elmi şəkildə təsdiqlənib.
İstintaq çərçivəsində jurnalistin oğurlanması və qətli ilə əlaqədar səkkiz nəfər saxlanılıb. Onların arasında Verakrus şəhərindən təxminən 300 kilometr cənubda yerləşən İxuatlan-del-Sureste bələdiyyəsinin dörd polis əməkdaşı da var.
Prokurorluğun məlumatına görə, həmin polis əməkdaşları cinayətkar qrupa maddi-texniki dəstək göstərməkdə, ərzaq və digər resurslarla təmin etməkdə şübhəli bilinirlər.
Mətbuat azadlığını müdafiə edən Article 19 təşkilatının məlumatına əsasən, bu il peşə fəaliyyəti ilə əlaqədar daha iki jurnalist öldürülüb. Təşkilat bildirir ki, Prezident Klaudiya Şeynbaum 2024-cü ilin oktyabrında vəzifəyə başladıqdan bəri ölkədə ümumilikdə 10 jurnalist qətlə yetirilib.
Bu göstəricilər Meksikanın jurnalistlər üçün dünyanın ən təhlükəli ölkələrindən biri hesab olunması ilə bağlı narahatlıqları bir daha gündəmə gətirib.
