BAKI, 19 dekabr. TELEQRAF

ABŞ Prezidenti Donald Tramp “Amerikanın Kosmik Üstünlüyünün Təmin Edilməsi” fərmanını imzalayıb.

Teleqraf xəbər verir ki, bununla ABŞ-nin kosmosdakı mövqelərinin gücləndirilməsi planlaşdırılır.

Sənədə əsasən, 2028-ci ilə qədər amerikalı astronavtların Aya qayıtması, 2030-cu ildə isə daimi Ay bazasının tikintisinin başlanılması nəzərdə tutulur. Proqrama həmçinin Yerin orbiti və Ayda nüvə reaktorlarının yerləşdirilməsi daxildir ki, onlardan biri 2030-cu ilə qədər istifadəyə hazır olmalıdır.

Fərman kosmik müdafiənin inkişafı, 2028-ci ilə qədər yeni raket əleyhinə texnologiyaların sınaqları və kosmik iqtisadiyyatın təşviqini əks etdirir, bu müddət ərzində azı 50 milyard dollarlıq investisiyanın cəlb olunması nəzərdə tutulur. Sənəddə həmçinin 2030-cu ilə qədər Yerin orbitində özəl kosmik stansiyaların yaradılması təsdiqlənir və sabiq prezident Co Bayden tərəfindən qəbul edilmiş kosmik siyasətə dair icraçı fərman ləğv edilir.