BAKI, 6 aprel. TELEQRAF

"Azərbaycan və Ermənistan martın ortalarında sülh müqaviləsi haqqında razılığa gəliblər. İrəliləyiş qaçılmazdır, lakin Azərbaycan hələ də iki əsas tələb irəli sürür: birincisi, vasitəçilik formatı kimi “Minsk qrupu” ləğv edilməlidir. İkincisi, Azərbaycan Ermənistan tərəfindən öz ərazi bütövlüyünün aydın şəkildə tanınmasını tələb edir".

Teleqraf xəbər verir ki, Azərbaycanın Almaniyadakı səfiri Nəsimi Ağayev ölkənin məşhur "Funke Media Group" qəzet və jurnallar şəbəkəsinə müsahibəsində belə deyib.

Səfir bildirib ki, Azərbaycanla Ermənistan arasındakı münanqişəni çox zaman "Avropada unudulmuş müharibə" adlandırırlar. Tərəflər razılığa gəlsələr də, hələlik tam sülhə nail olmayıblar.

N.Ağayev deyib: "Biz bu saziş üzərində 2021-ci ildən işləyirik. Lakin Ermənistanın Qarabağı müqaviləyə daxil etmək tələbi səbəbindən irəliləyiş əldə etmək uzun müddət mümkün olmadı. Bizim mövqeyimiz həmişə aydın olub: Qarabağ Azərbaycanın bir hissəsidir. Biz heç bir ölkə ilə, hətta Ermənistanla belə bu barədə danışıq aparmırıq... Yalnız 2023-cü ilin sentyabrında Azərbaycan Qarabağda öz suverenliyini bərpa etdikdən sonra Ermənistan bu tələbdən əl çəkməyə razı oldu. 2024-cü ilin fevralında biz Almaniyada sülh danışıqlarını bərpa etdik və keçən mart ayında mətnlə bağlı razılığa gəldik”.

Onun fikrincə, davamlı sülh perspektivi ilk növbədə münaqişə tərəfləri arasında birbaşa danışıqlarla bağlıdır: "Biz ərazi bütövlüyünün qarşılıqlı tanınması, münasibətlərimizin normallaşdırılması və bir çox başqa məsələlərlə bağlı bərabərhüquqlu danışıqlar aparırıq”.

N. Ağayev əlavə edib: "Dünya gördü ki, ən yaxşı nəticələr yalnız Ermənistanla birbaşa danışıqlar yolu ilə əldə edilə bilər. Hər iki ölkə bunu artıq sübut edib. Sülh müqaviləsinin mətni bizim aramızda birbaşa danışıqlarda - üçüncü ölkələrin vasitəçiləri olmadan razılaşdırılıb".