BAKI, 4 aprel. TELEQRAF

Azərbaycan ilə Rusiya arasında diplomatik münasibətlərin qurulmasının 33 ili tamam olur.

Teleqraf xəbər verir ki, bu münasibətlə, Azərbaycan xarici işlər naziri Ceyhun Bayramov və rusiyalı həmkarı Sergey Lavrov arasında təbrik məktublarının mübadiləsi baş tutub.

Azərbaycan xarici işlər nazirinin ünvanlandığı məktubun mətnini təqdim edirik.

"Hörmətli Sergey Viktoroviç,

Azərbaycan Respublikası ilə Rusiya Federasiyası arasında diplomatik münasibətlərin qurulmasının 33 illiyi ilə əlaqədar səmimi təbrikləri qəbul edin.

Ötən onilliklər ərzində ölkələrimiz arasında ümumi tarixi dəyərlərə, qarşılıqlı hörmətə və etimada əsaslanan, o cümlədən bir-birinin maraqlarını nəzərə alan ikitərəfli münasibətlər uğurla inkişaf edərək strateji tərəfdaşlıqdan müttəfiqlik münasibətlərinə çevrilib.

Təbii ki, ən yüksək səviyyədə müntəzəm siyasi dialoq əməkdaşlığın mütərəqqi inkişafında mühüm amil olmaqla hər zaman Azərbaycan-Rusiya qarşılıqlı fəaliyyətinə rəvac verib.

22 fevral 2022-ci il tarixində Müttəfiqlik qarşılıqlı fəaliyyəti haqqında Bəyannamənin imzalanması dövlətlərarası münasibətlərin keyfiyyətcə yeni səviyyəyə keçidini təmin edərək, müxtəlif sahələrdə uzunmüddətli əməkdaşlıq üçün möhkəm zəmin yaradıb.

Bu gün, intensiv ikitərəfli təmaslarla səciyyələnən müttəfiqlik qarşılıqlı fəaliyyəti səmərəli şəkildə möhkəmlənməkdə davam edir. Bunun bariz nümunəsi ticarət dövriyyəsinin durmadan artması, qanunvericilik bazasının genişləndirilməsi, eləcə də birgə layihə və təşəbbüslərin uğurla həyata keçirilməsidir. İkitərəfli gündəmdə mədəni-humanitar əlaqələrin və regionlararası əməkdaşlığın genişləndirilməsi məsələləri xüsusi yer tutur.

Şübhəsiz ki, xarici siyasət qurumları arasında sıx əməkdaşlıq qarşılıqlı maraq doğuran geniş spektrli məsələlər üzrə müttəfiqlik qarşılıqlı fəaliyyətin möhkəmlənməsinə kömək edir.

Əminəm ki, Azərbaycan-Rusiya münasibətləri dövlətlərimizin və xalqlarımızın mənafelərinə uyğun olaraq bundan sonra da hərtərəfli şəkildə dərinləşəcək və yeni məzmunla təmin olunacaqdır.

Cənab Nazir, yüksək ehtiramımı diqqətinizə çatdırıram.

Ən xoş arzularla, Ceyhun Bayramov"

Rusiya xarici işlər nazirinin Sergey Lavrovun məktubunda qeyd olunur ki, keçən onilliklər ərzində, əsrlik dostluq və qarşılıqlı hörmət ənənələrinə əsaslanaraq ölkələrimiz arasında əlaqələr davamlı şəkildə güclənib: "Bu əlaqələr strateji tərəfdaşlıq və müttəfiqlik prinsipləri üzərində inkişaf etməkdədir. Xüsusilə, Rusiya Prezidenti Vladimir Putin və Azərbaycan Prezidenti İlham Əliyev arasında qurulmuş etibarlı dialoq bu münasibətlərin möhkəmlənməsində mühüm rol oynayır. Biz xarici işlər nazirləri olaraq, bu əlaqələrin inkişafını davam etdirməkdə qərarlıyıq. Əminəm ki, beynəlxalq səviyyədə birgə fəaliyyət və qarşılıqlı dəstək, həmçinin Müstəqil Dövlətlər Birliyi (MDB) və regional formatlarda faydalı əməkdaşlıq Cənubi Qafqaz ilə Xəzər bölgəsində sabitlik və təhlükəsizliyin gücləndirilməsinə kömək edəcəkdir".