BAKI, 20 may. TELEQRAF

Mənzil təminatı sahəsində ən qəliz məsələ maliyyələşdirmə hissəsidir, çünki uzunmüddətli maliyyə vəsaitlərinin əlçatanlığı sosial icarə mənzil təminatında əsas açardır.

Teleqraf xəbər verir ki, bunu Əlverişli Mənzil İnstitutunun direktoru Margaux Morenas WUF13 çərçivəsində keçirilən "Aşağı Gəlirli Kirayə Mənzillərində Nə İşləyir? Ölçülən Həllər üçün Qlobal Həmyaşıd Öyrənmə Laboratoriyası" tədbirində deyib.

O bildirib ki, həmçinin, maraqlı tərəflərə düzgün subsidiyaların yönəldilməsi bizim bazarda müəyyən etdiyimiz əlverişli şərtlərin bir hissəsidir.

"İdarəetmə şirkətləri və texniki xidmət fəaliyyətləri üçün yaxşı mühitin yaradılması və bu sektorun peşəkarlaşdırılması vacibdir. Bu, hazırda Latın Amerikasında çatışmayan bir sahədir. Halbuki, bu sektor bazarı real şəkildə dəstəkləmək üçün mütləq böyüməlidir. Dünyanın başqa yerlərində bu qitə üçün maraqlı ola biləcək çox yaxşı nümunələr var. Bu texniki xidmət fəaliyyətləri həm də sosial proqramlarla müşayiət olunmalıdır ki, ailələrə sosial icarə mənzillərindəki məişət həyatları boyunca real şəkildə dəstək göstərilsin.

Digər yerlərdə gördüyümüz bəzi siyasətlər var. Latın Amerikası ölkələri də diqqət yetirərək onlardan istifadə edə bilərlər. Bu siyasətləri qiymət, maliyyə və institusional kateqoriyalar üzrə qruplaşdırmışıq. Bu, ekosistemin yaradılması üçün çox vacibdir, ekosistem və lazımi iştirakçılar qrupu olmadan bazarı formalaşdırmaq həqiqətən də mümkün deyil. Bu, özəl sektor kimi yeni iştirakçıların prosesə cəlb edilməsi, həmçinin sosial icarə mənzillərinin yaradılması və istehsalı yollarının nəzərdən keçirilməsi deməkdir.

Sosial icarə mənzilləri mövzusunda böyük bir dəstək ehtiyacının olduğunu vurğulamaq çox vacibdir. Bu mühitdə fəaliyyət göstərən və sözügedən ekosistemləri quran digər ölkələrin təcrübələrindən dərslər çıxarmaq, sahəni yeni araşdırmağa başlayan bəzi ölkələr üçün irəliyə doğru addımlamaq baxımından fundamental bir imkandır", - o vurğulayıb.