MİNGƏÇEVİR, 12 oktyabr. TELEQRAF

Mingəçevirdə tələbənin otaq yoldaşı tərəfindən bıçaqlanmasının şahidi olmuş şəxs danışıb.

Hadisənin baş verdiyi 20 Yanvar küçəsi, 6 ünvandakı beşmərtəbədə yaşayan Kəmalə Rüstəmova Teleqraf-ın Mərkəzi Aran bürosuna bildirib ki, Mingəçevir Turizm Kollecinin tələbələri olan Nurəddin Hüseynov və Dağlar Mehdizadə həmin binanın 3-cü mərtəbəsində kirayədə qalıblar:

"Mənzildə daha bir neçə tələbə kirayədə yaşayır. 19 yaşlı Dağlar Mehdizadə Ağdaşdan, onu bıçaqlayan 18 yaşlı Nurəddin Hüseynov isə Şəkidəndir".

Kəmalə Rüstəmovanın sözlərinə görə, o, bloka çıxanda qəfil Dağlar Mehdizadə qan içində və ev geyimində onun üstünə qaçıb və kömək istəyib: "Məni qucaqladı, yalvardı ki, ana, məni xilas elə..." Hönkürtüylə ağlayırdı. Ona ürək-dirək verdim. Qonşu kişiylə onu sakitləşdirib təcili yardım çağırdıq".

Kəmalə Rüstəmova bildirib ki, tələbələr arasında dava söyüş üstündə olub: "Dağlardan soruşdum ki, niyə dalaşdınız, cavab verdi ki, Nurəddin söyüş söydü, cavab qaytardım. Mübahisə oldu, o da məni bıçaqla vurdu".

Qeyd edək ki, Dağlar Mehdizadə kollecin sonuncu kursunda, onu bıçaqlayan Nurəddin Hüseynov isə birinci kursda təhsil alır.

Nurəddin Hüseynov polis tərəfindən saxlanılıb.

***

13:16

Mingəçevirdə 18 yaşlı Nurəddin Hüseynov şəxsi münasibətlər zəminində aralarında yaranmış mübahisə zamanı 19 yaşlı Dağlar Mehdizadəyə kəsici alətlə xəsarət yetirib.

Teleqraf-ən Mərkəzi Aran bürosu xəbər verir polis əməkdaşları tərəfindən əməli törədən şəxs saxlanılıb.

***

12:59

Mingəçevirdə tələbə bıçaqlanıb.

Teleqraf-ın Mərkəzi Aran bürosu xəbəri verir ki, hadisə Mingəçevir Turizm Kolleci yaxınlığındakı evlərdən birində baş verib.

Məlumata görə, kollecin 2007-ci il təvəllüdlü tələbəsi Mehdizadə Dağlar Soltan oğlu mübahisə zəminində tələbə yoldaşı tərəfindən sağ kürək nayihəsindən bıçaqlanıb.

Yaralı tələbə təcili xəstəxanaya çatdırılıb.

Faktla bağlı araşdırma başlanıb.