BAKI, 25 fevral. TELEQRAF

Azərbaycanda həbsdə olan ukraynalı kriminal avtoritet "Oleq Bakinski” ləqəbi ilə tanınan Krapivin Oleq Andreyeviç və Ukrayna müdafiə sənayesi nazirinin Avrasiya məsələləri üzrə sabiq müavini Kuçer Konstantin Antonoviçin cinayət işi üzrə növbəti məhkəmə prosesi keçirilib.

Teleqraf xəbər verir ki, Bakı Ağır Cinayətlər Məhkəməsində hakim Elnur Nuriyevin sədrlik etdiyi prosesdə təqsirləndirilən Konstantin Kuçer dövlət ittihamçısının suallarını cavablandırıb.

O deyib ki, zərərçəkmiş Valeriy Zaxarenkoya məxsus şirkətlərlə mülki aviasiya avadanlıqları və hissələrinin alqı-satqısı ilə bağlı müqaviləsi olub. O, bu işlə 2017-ci ildə Fransada yaşadığı vaxtdan məşğul olduğunu bildirib.

Təqsirləndirilən şəxs qeyd edib ki, avadanlıqları İspaniyada həyat yoldaşının adına olan şirkət vasitəsi ilə alqı-satqı edib. Ukrayna və digər ölkələrdən aviaavadanlıqlar alaraq başqa ölkələrə satıb. O, 2019-cü ildə Valeriy Zaxarenkoya məxsus “Aviazapchast” və “Promyshlennye Postavki Kazakhstan” şirkətləri ilə müqavilələr bağlayıb.

İttihamı qəbul etməyən Konstantin Kuçer dövlət ittihamçısının suallarını cavablandırarkən deyib ki, qarşı tərəf ABŞ-nin sanksiyaları altına düşdüyündən onların sifariş etdikləri aviahissələri çatdırmaqla bağlı logistik problemlər yaranıb.

Dövlət ittihamçısı konkret hansı aviahissələrdən söhbət getdiyini soruşub. Kuçerin vəkili bu sualın ittihama aidiyyəti olmadığını desə də, hakim təqsirləndirilən şəxsdən suala cavab verməsini istəyib.

Kuçer deyib ki, Rusiya tərəfi əsasən təyyarələr üçün naviqasiya sistemlərini sifariş edib. Dövlət ittihamçısının həmin sistemlərin hərbi təyinatlı olub-olmamasına dair sualına Konstantin Kuçer "mülki təyinatlı olub" cavabını verib. Dövlət ittihamçısı növbəti dəfə dəqiqləşdirici sual verib və sifariş olunan naviqasiya sistemlərinin hərbi təyyarələrdə istifadəsinin mümkünlüyünü soruşub.

Bu dəfə də Konstantin Kuçerin vəkili suala etiraz edib, işin mahiyyətinə aidiyyəti olmadığını deyib. Hakim sualı çıxarmadan Konstantin Kuçerdən cavablandırılmasını istəyib. Kuçer deyib ki, həmin sistemlər əsasən “AN-132” təyyarələrində istifadə olunur. Həmin təyyarələr isə mülki təyinatlıdır.

Onun sözlərindən bəlli olub ki, 2024-cü ilin iyulunadək - hüquq-mühafizə orqanlarına şikayət edənə qədər Valeriy Zaxarenko ilə münasibətləri normal olub:

"Zaxarenkov və onun şirkətlərinin nümayəndələri hər dəfə Bakıya gəlməzdən öncə mənimlə əlaqə saxlayıblar. Mən də onları qarşılamaq üçün hava limanına maşın göndərmişəm, Bakıda qalmaları üçün hotel rezervasiya etmişəm.

Hadisə baş verən gün isə Valeriy Zaxarenkoya zəng edərək Bakıda olduğunu dedikdə buna təəccübləndim. Qəfil gəlişin səbəbi mənə görüş zamanı bəlli oldu".

Konstantin Kuçer söyləyib ki, görüşdə Oleq Bakinskini Valeriy Zaxarenko və digərləri ilə birgə görəndə bir daha təəccüblənib. Bakinskinin “Aviazapchast” rəsmiləri ilə tanışlığının olmasından bixəbər olduğunu onun özünə də deyib. Bildirib ki, Oleq Bakinskini əvvəldən tanıyır. Rusiyadan gələnlər isə heç zaman Oleqlə tanış olduqlarını ona deməyiblər. Söhbət əsnasında Valeriy Zaxarenko Konstantin Kuçerə deyib ki, ya pulları qaytarmalı, ya da sifarişlər üzrə malları çatdırmalıdır. Kuçer isə malların İspaniyada ABŞ sanksiyaları səbəbindən müsadirə edildiyini, pulların isə “Günay Bank”dakı hesablarda olduğunu, bankın isə 2023-cü ildə bağlandığını, bu səbəbdən pulları çıxara bilmədiyini deyib. Valeriy Zaxarenko dediklərinə inandırmaq üçün o, ofisdən kənarda olan, aviahissələrin sifariş olunmasına dair sənədləri, qəbzləri gətirmək üçün çıxıb. 5-10 dəqiqə sonra qayıtdıqda isə Zaxarenko orada görməyib.

Dövlət ittihamçısının suallarını cavablandıran Konstantin Kuçer deyib ki, o, ofisə qayıdandan sonra orada hər hansı bir qarışıqlıq görməyib deyə Valeriy Zaxarenko ilə Oleq Bakinski arasında mübahisə yaşandığını da bilməyib.

Daha sonra Valeriy Zaxarenko sərbəst ifadə verib. O deyib ki, 2019-cü ildə Konstantin Kuçer onun şirkətinə rəsmi qaydada müraciət edərək əməkdaşlıq təklif edib. Qısa araşdırmalardan sonra onunla əməkdaşlıq edib sifarişlər veriblər.

İlk sifarişlər yerinə yetirilsə də, sonradan Konstantin Kuçer müxtəlif bəhanələrlə sifarişləri yerinə yetirməyib: "Buna görə də “Aviazapchast” nümayəndələri, hüquqşünasları bir neçə dəfə Bakıya gələrək Konstantin Kuçerlə görüşdülər. Lakin Kuçer hər dəfə bir bəhanə edib və sifarişləri yerinə yetirməyib. Sifarişlərə görə onun şirkətinin hesabına köçürülən pulları da geri qaytarmayıb. Buna görə də özüm məsələni araşdırmaq üçün Bakıya gəldim, Kuçerlə görüşə getdim. Görüşdə Kuçer Oleq Bakinskini mənə özünün şəriki kimi təqdim etdi. Söhbəti onunla aparmalı olduğumu dedi".

Valeriy Zaxarenkonun bu sözləri Oleq Bakinskinin kəskin etirazına səbəb olub. O deyib ki, görüşə Valeriy Zaxarenkovun istəyi ilə onunla birgə gedib. Hakim Oleq Bakinskiyə yerindən danışdığına görə xəbərdarlıq edib, Valeriy Zaxarenkova isə ifadəsini davam etdirməsini tapşırıb.

Valeriy Zaxarenkonun sözlərindən məlum olub ki, orada Oleq Bakinski onu söyüb-təhqir edib.

Bundan sonra isə stolun üstündəki su şüşələrini götürərək onun başına tərəf atıb: "Həmin vaxt Konstantin Kuçer də su butulkalarını baş nahiyəmə tərəf tulladı. Əllərim ilə bir neçə butulkanı başıma dəyməkdən yayındırsam da, biri alnıma dəydi. Zərbənin təsirindən başım yarıldı deyə Sergey Styopin məni otaqdan çıxardı. Sonra xəstəxanaya getdim. Orada alnıma tikiş qoyuldu".

Bu zaman Oleq Bakinski Valeriy Zaxarenkonu yenə yalan danışmaqda ittiham edib. O bildirib ki, ofisdə görüş zamanı Valeriy Zaxarenkov Konstantin Kuçerin ünvanına nalayiq söyüşlər işlədib. Həmin vaxt Kuçer ofisdə olmadığından o, Valeriy Zaxarenkovdan söyüş söyməməsini istəyib.

O isə yenidən və daha kəskin söyüşlər söyüb və ayağa qalxaraq üzərinə yeriyəndə ayağı stola ilişib və yıxılaraq başından xəsarət alıb.

Bundan sonra Sergey Styopin şahid qismində ifadə verib. Şahid bildirib ki, məlum görüş çox qısa bir müddətdə olub. Görüş zamanı Konstantin Kuçerlə Oleq Bakinski Valeriy Zaxarenkonun başına butulka ilə xəsarət yetiriblər. O, Bakıya Konstantin Kuçerdən hesabına ödədikləri pulları almaq üçün gəldiklərini, bu alınmadıqda isə məhkəməyə müraciət etmək niyyətində olduqlarını bildirib. Deyib ki, ofisdə məlum insident yaşandıqdan sonra məhkəməyə müraciət etməyiblər. Məhkəmənin sonunda zərərçəkən və şahid tərəflərin suallarını cavablandırıblar.

İttihama görə, zərərçəkən kimi tanınan V.Zaxarenkonun lisenziyası ləğv edilmiş "Günay Bank"da bir neçə milyon avro pulu olub. Rusiya Federal Təhlükəsizlik Xidmətinin əməkdaşı V.Zaxarenko vəsaitini götürmək üçün Bakıya gəlib, ancaq bank bağlandığından həmin pulları çıxarmaqda problem yaranıb.

Oleq Bakinski, K.Kuçer və V.Zaxarenko məsələni yoluna qoymaq üçün Bakının Xətai rayonunda yerləşən Babək Plazada görüşüblər. Lakin tərəflər ortaq məxrəcə gələ bilməyiblər və aralarında mübahisə düşüb. O.Bakinski şüşə butulka ilə V.Zaxarenkova xəsarət yetirib. Sonuncuya tibbi yardım göstərmək üçün Yeni Klinikaya aparıblar.

Cinayət işi üzrə V.Zaxarenko zərərçəkmiş kimi tanınıb.

Eyni zamanda, daha iki şirkət zərərçəkmiş sayılır. Bunlar “Aviazapchast” Açıq Səhmdar Cəmiyyəti və “Promyshlennye Postavki Kazakhstan” Məhdud Məsuliyyətli Cəmiyyətdir.

O.Krapivin 2024-cü ilin iyulun sonlarında Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən Bakıda həbs olunub.

O, kriminal aləmdə “Oleq Bakinski” ləqəbi ilə tanınır. O, Cinayət Məcəlləsinin az ağır xəsarət yetirmə, xuliqanlıq, K.Kuçer isə xuliqanlıq və dələduzluq maddələri ilə ittiham olunurlar. Sonuncu eyni zamanda məcəllənin 178.4-cü (xüsusi ilə külli miqdarda dələduzluq törətmək) maddəsi ilə günahlandırılır.