BAKI, 25 sentyabr. TELEQRAF

Azərbaycan mövcud tərəfdaşlıqlara daha çox investisiya yatırıb. Mərkəzi Asiya regional qarşılıqlı ticarət və investisiyalar baxımından ən böyük və ən sürətlə inkişaf edən istiqaməti təmsil edir.

Teleqraf xəbər verir ki, bu barədə iqtisadiyyat naziri Mikayıl Cabbarov II Azərbaycan Beynəlxalq İnvestisiya Forumunda panel müzakirəsində deyib.

Nazir qeyd edib ki, ikinci istiqamət isə Körfəz regionudur:

“Bu baxımdan biz birgə investisiya fondlarından istifadə etməkdən çəkinməmişik, həmçinin ÜDM-dən ümumi milli gəlirə keçidə daha çox diqqət yetirmişik.

Azərbaycanın həm dövlət, həm də özəl şirkətlərinin bir çoxunun bu istiqamətdə atdığı addımları xüsusi qeyd etmək istərdim. Onlar müəyyən mənada xalis kapital ixracatçısına çevriliblər.

Lakin biz buna yalnız kapital ixracı kimi baxmırıq. Bunu həm də bilik və təcrübə mübadiləsi kimi qiymətləndiririk. Bu proses əslində hər iki istiqamətdə gedir.

Düşünürəm ki, bu gün və sabah, Prezidentin iştirakı ilə bir sıra sazişlərin imzalanmasının şahidi olacağıq. Bunlar yalnız müqavilələr, yalnız ölkəyə daxil olan investisiyalar deyil, həm də xaricə yönələn investisiyalar olacaq.

Əlbəttə, güclü tərəfdaşlıqlar və qarşılıqlı etimad olmadan bunu həyata keçirmək mümkün deyil”.