BAKI, 4 aprel. TELEQRAF

Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) tərtib etdiyi dünya ərzaq qiymətləri indeksi fevral ayındakı 126,8-dən mart ayında 127,1-ə yüksəlib. Bu da ötən ilin eyni dövrü ilə müqayisədə 6,9 faiz, lakin 2022-ci ilin mart zirvəsindən 20,7 faiz aşağıdır.

Teleqraf xəbər verir ki, taxıl qiymətləri indeksi mart ayında 2,6 faiz azalaraq 2024-cü ilin mart səviyyəsindən 1,1 faiz aşağı olub.

Şimal yarımkürəsinin bir sıra əsas ixracatçı ölkələrində məhsul qıtlığı ilə bağlı narahatlığın azaldılması səbəbindən qlobal buğda qiymətlərində eniş müşahidə edilib. Lakin valyuta bazarındakı dalğalanmalar ucuzlaşmanı məhdudlaşdırıb.

Dünya bazarında qarğıdalı, sorqo və arpa qiymətləri də fevral ilə müqayisədə ucuzlaşıb. Düyü qiymətləri indeksi zəif idxal tələbi və güclü ixrac təklifi fonunda 1,7 faiz azalıb.

FAO-nun bitki yağının qiymət indeksi isə əksinə, fevral ayı ilə müqayisədə 3,7 faiz artıb. Ötən ilin mart ayının orta göstəricisini 23,9 faiz üstələyib. Palma, soya, kolza və günəbaxan yağlarının kotirovkalarının bahalaşması dünya bazarlarındakı idxal tələbinin yüksək olması ilə bağlı olub.

Ətin qiyməti indeksi 0,9 faiz artaraq ötən ilin eyni dövrü ilə müqayisədə 2,7 faiz yuxarı olub. Avropada donuz ətinin qiymətlərinin artması və avronun ABŞ dollarına nisbətdə möhkəmlənməsi ilə bağlıdır. Bəzi əsas istehsalçı ölkələrdə quş qripinin geniş yayılması ilə bağlı narahatlıqlar davam etsə də, qlobal bazarda quş ətinin qiyməti cüzi dəyişib.

Süd məhsullarının qiymətləri martda fevral ayı ilə müqayisədə dəyişməyib. Şəkərin qiyməti isə martda 1,4 faiz ucuzlaşıb. Bu ilk növbədə qlobal bazarlarda tələbin zəifləməsi tendensiyası ilə əlaqədar olub.