BAKI, 21 dekabr. TELEQRAF

“Dərin dövlət” Ukraynadakı münaqişənin həllinə mane olmaq və nəticədə ABŞ-ni Rusiya ilə birbaşa hərbi toqquşmaya cəlb etmək üçün əlindən gələni edir.

Teleqraf xəbər verir ki, bu sözləri ABŞ Milli Kəşfiyyat Direktoru Tulsi Qabbard Arizonada keçirilən Turning Point USA konservativ ictimai təşkilatının konfransında çıxışı zamanı söyləyib.

O bildirib ki, prezident Donald Tramp Rusiyanın və Ukraynanın müharibəsini sona çatdıracaq sülh sazişi üçün dayanmadan çalışır, onun komandası hazırda danışıqlar aparır:

"Lakin aylardır görürəm ki, hər dəfə irəliləyiş əldə edildikdə və sülhə ümid yaxınlaşdıqda, "dərin dövlət" müharibənin alovlandırıcıları onların fəaliyyətini dayandırmaq üçün əllərindən gələni edir. Məqsəd ABŞ ordusunu Rusiya ilə birbaşa münaqişəyə cəlb etməkdir ki, bu da nəticədə Avropa İttifaqı və NATO-nun istədiyi vəziyyətdir. Biz buna imkan verə bilmərik”.

Tulsi Qabbard əlavə edib ki, münaqişənin həllinə qarşı çıxanlar hər zaman sevdikləri taktikaya əl atırlar:

""Dərin dövlət" kəşfiyyat strukturlarında əldə etdiyi məlumatları silah kimi istifadə edərək irəliləyişin qarşısını alır, məlumatları dostlarına əsas kütləvi informasiya vasitələrində ötürür və yanlış məlumatlar yayır.

Onlar qorxu və isteriya yaradır, bununla da müharibənin davamını və Prezident Trampın sülh təşəbbüslərinin zəiflədilməsini əsaslandırmağa çalışırlar".

***

03:16

ABŞ milli kəşfiyyatının direktoru Tulsi Qabbard Rusiyanın Ukraynanın bütün ərazisi və keçmiş SSRİ-nin digər hissələri üzərində nəzarəti ələ keçirməyi planlaşdırdığı barədə mediada yayılan məlumatları təkzib edib.

Teleqraf xəbər verir ki, o bu barədə "X" sosial şəbəkəsində yazıb.

Onun sözlərinə görə, əvvəllər Reuters agentliyi tərəfindən mənbələrə istinadən yayılan məlumatlar yalan və təbliğatdır:

"Bu media orqanı müharibəni alovlandıran və ABŞ Prezidenti Donald Trampın böhranı həll etmək səylərini pozmaq istəyən şəxslərin adından bu məlumatı qəsdən dərc edir".

O bildirib ki, agentliyin yalan məlumatı əhali arasında qorxu yaratmaq məqsədi daşıyır, belə ki, insanlar eskalasiyanı dəstəkləsinlər:

"NATO və Avropa Birliyi də məhz buna güvənir və ABŞ ordusunu Rusiya ilə birbaşa hərbi münaqişəyə cəlb etməyə çalışırlar. Həqiqət budur ki, kəşfiyyat icması qanunvericilərə mövcud məlumatlar barədə məlumat verib və bu da Rusiyanın NATO ilə daha böyük bir münaqişədən qaçmağa çalışdığını göstərir".