BAKI, 22 oktyabr. TELEQRAF

Bu gün “Qarabağ” UEFA Çempionlar Liqasının əsas mərhələsinin III turunda İspaniyada “Atletik Bilbao” ilə qarşılaşacaq.

Teleqraf xəbər verir ki, “San Mames” stadionunda təşkil olunacaq görüş Bakı vaxtı ilə saat 20:45-də başlayacaq.

Matçın baş hakimi xorvatiyalı İqor Payaç olacaq.

“Atletik Bilbao” ilk iki turda xal toplaya bilməyib. Ernesto Valverdenin rəhbərlik etdiyi kollektiv evdə İngiltərə “Arsenal”ına 0:2, səfərdə Almaniyanın “Borussiya Dortmund” klubuna 1:4 hesabı ilə uduzub.

“Qarabağ” isə keçirdiyi hər iki oyunda qələbəyə sevinib. Qurban Qurbanovun komandası Portuqaliyada “Benfika”nı 3:2, evdə isə Danimarka “Kopenhagen”ini 2:0 hesabı ilə üstələyib.