BAKI, 2 aprel. TELEQRAF

Futbol üzrə Azərbaycan Kubokunda ikinci yarımfinal oyununda “Sabah” səfərdə “Neftçi”yə 2:1 hesabı ilə qalib gəlib.

Teleqraf xəbər verir ki, "Neftçi Arena"da keçirilən görüşü FIFA referisi Əliyar Ağayev idarə edib.

Matçın 11-ci dəqiqəsində qonaqların futbolçusu Umarali Raxmonaliyevin künc zərbəsindən sonra Azər Salahlı öz qapısına qol vurub. Görüşün 21-ci dəqiqəsində Tellur Mütəllimovun Ağadadaş Salyanskiyə qarşı kobudluğundan sonra meydan sahibləri penalti qazanıb.

“Bayquşlar”ın qapısına 11 metrlik cərimə zərbəsini Yuri Matias yerinə yetirməyə yaxınlaşıb. Onun zərbəsini rəqib qapıçı Stas Pokatilov dəf etsə də, braziliyalı müdafiəçi qayıdan topu qapıya göndərə bilib.

Matçın 52-ci dəqiqəsində isə Pavol Şafranko Xəyal Əliyevin ötürməsindən sonra uzaqdan zərbə ilə "Neftçi"nin qapısına yol taparaq komandasının qələbəsini təmin edib.

Günün ilk qarşılaşmasında “Araz-Naxçıvan” “Liv Bona Dea Arena”da “Qarabağ”ı 1:0 hesabı ilə məğlub edib.

Qeyd edək ki, yarımfinal mərhələsinin cavab görüşləri aprelin 23-də keçiriləcək.