BAKI, 6 fevral. TELEQRAF

ABŞ Federal Təhqiqat Bürosu (FTB) Prezident Donald Trampa və Miqrasiya və Gömrük Xidməti (ICE) əməkdaşlarına qarşı hədələrlə bağlı Ohayo ştatının sakinini saxlayıb.

Teleqraf xəbər verir ki, bu barədə Ohayonun şimal dairə məhkəməsinin elektron bazasında dərc olunan sənədlərdə bildirilib.

Məlumata görə, 47 yaşlı Çarlz Bronson İnqram "YouTube" platformasında paylaşdığı materiallarda ICE əməkdaşlarının, Trampa səs vermiş şəxslərin və prezidentin “Amerika hər şeydən əvvəl” prinsipini dəstəkləyənlərin öldürülməsinə çağırışlar edib. Onun paylaşımları arasında Donald Trampın edam olunmasına çağırış da yer alıb.

Fevralın 4-də FTB əməkdaşları şübhəlinin evində axtarış aparıb. Axtarış zamanı odlu silah və döyüş sursatı aşkarlanıb.