BAKI, 15 noyabr. TELEQRAF
ABŞ prezidenti Donald Tramp bildirib ki, 42-ci prezident Bill Klinton maliyyəçi Ceffri Epşteynə məxsus adanı dəfələrlə ziyarət edib.
Teleqraf xəbər verir ki, Tramp bu fikri Floridaya uçuşu zamanı jurnalistlərin suallarını cavablandırarkən söyləyib.
“Onun adasında heç vaxt olmamışam. Bill Klinton isə iddiaya görə ora 28 dəfə gedib”, - deyə Tramp bildirib.
ABŞ lideri hesab edir ki, demokratlar Epşteyn işi ətrafında mövzunu qəsdən gündəmdə saxlayır, bununla da öz uğursuzluqlarından və Tramp administrasiyasının nailiyyətlərindən diqqəti yayındırmağa çalışırlar.
“Bu, demokratların mistifikasiyasıdır. Onlar bu işlə hökumətin bağlanması (şatdaun) məsələsindəki məğlubiyyətlərini və seçkilərdə uduzmalarını ört-basdır etmək istəyirlər. Onlar seçkilərdə uduzdular, yelləncək ştatları itirdilər, hər şeyi itirdilər. Epşteynin müzakirəsi respublikaçıların uğurlarından diqqəti yayındırır”, - Tramp vurğulayıb.
Prezident əlavə edib ki, əgər Demokrat Partiyasının onunla bağlı ittiham edəcək real bir dəlili olsaydı, bunu seçkilərdən əvvəl məmnuniyyətlə istifadə edərdilər.
