BAKI, 2 aprel. TELEQRAF

Avropa ölkələri Ukraynaya tam şəkildə ABŞ kimi hərbi yardımlar etməyə qadir deyillər.

Teleqraf xəbər verir ki, bu barədə Litvanın xarici işlər naziri Kestutis Budris bildirib.

Nazir vurğulayıb ki, ABŞ-dən Ukraynaya göndərilən bəzi kritik tədarüklərin alternativi yoxdur.

"Biz hamımız bu tədarüklərin nə olduğunu bilirik. Buna görə də ABŞ ilə əməkdaşlığımızı davam etdirməliyik",- o qeyd edib.

Xatırladaq ki, ABŞ Prezidenti Donald Tramp fevralın 28-də Ukrayna Prezidenti Volodimir Zelenski ilə mübahisə etdikdən bir neçə gün sonra Kiyevə olan bütün hərbi yardımları dayandırıb. Bu qərar martın 4-də qüvvəyə minib.

Lakin martın 11-də ABŞ prezidentinin milli təhlükəsizlik üzrə köməkçisi Mayk Uolts Vaşinqtonun Ukraynaya təcili hərbi yardım göndərməyə davam edəcəyini açıqlayıb.