Oktyabrın 9-da Türkiyə prezidenti Rəcəb Tayyib Ərdoğan hökumətlə İsraildəki vəziyyətin nizamlanmasına dair addımları müzakirə edəcək.
Teleqraf.com xəbər verir ki, mətbuatda bu barədə Türkiyə liderinin administrasiyasındakı nümayəndəyə istinadən xəbər yayılıb.
“Sabah cənab Prezidentin Beştəpədəki iqamətgahında Nazirlər Kabinetinin iclası keçiriləcək. Əsas gündəm sosial-iqtisadidir, lakin təbii ki, xarici siyasətdə baş verən hadisələrə qiymət veriləcək. Cənab prezident İsraildəki vəziyyəti izləyir və Nazirlər Kabineti ilə Ankaranın vəziyyəti həll etmək üçün göstərə biləcəyi diplomatik səyləri müzakirə edəcək”, - Ərdoğan administrasiyası bildirib.
Xatırladaq ki, oktyabrın 7-də səhər Qəzza zolağından İsrailə raket hücumları başlayıb və eyni zamanda yaraqlı qruplar İsrail hərbçilərinin onlarla döyüşə girdiyi yəhudi dövlətinə daxil olub. Ordu “müharibə hazırlığı vəziyyəti” elan edib və tezliklə cavab olaraq “Dəmir qılınclar” əməliyyatına başladığını açıqlayıb.
