BAKI, 28 sentyabr. TELEQRAF

İsrailin Baş naziri Benyamin Netanyahu Misir hakimiyyətinin 7 oktyabr 2023-cü ildə HƏMAS tərəfindən planlaşdırılan hücum barədə İsraili əvvəlcədən xəbərdar etdiyi barədə məlumatları təkzib edib.

Teleqraf xəbər verir ki, İsrailin Baş naziri həmçinin bu cür iddiaların müəlliflərinə qarşı məhkəmə iddiası qaldırmağı əmr edib.

Daha əvvəl "The Wall Street Journal" mənbələrə istinadən Misirin İsrailə hücuma hazırlıq barədə bir neçə dəfə xəbərdarlıq etdiyini bildirmişdi. Qəzetin məlumatına görə, belə xəbərdarlıqlardan birini İsrail tərəfinə o dövrdə Misir kəşfiyyatının rəhbəri vəzifəsini tutan Abbas Kamel çatdırıb.

Netanyahunun rəsmi saytında yerləşdirilmiş açıqlamada deyilir: "7 oktyabrdan əvvəlki aylarda Netanyahu o vaxtlar Misirin kəşfiyyat xidmətinin rəhbəri olan Abbas Kamel ilə görüşməyib və ya danışmayıb və İsrailin heç bir kəşfiyyat xidməti Misirin xəbərdarlığını baş nazirə çatdırmayıb".

Bu, Netanyahunun mediaya qarşı başlatdığı ilk belə iddia deyil. Üç həftə əvvəl o, vəkillərinə "Haaretz" qəzetinə qarşı məhkəmə iddiası qaldırmağı tapşırmışdı. Qəzet iddia edirdi ki, 7 oktyabr hücumundan on gün əvvəl Birləşmiş Ərəb Əmirliklərinin prezidenti Məhəmməd bin Zayed Əl Nəhyan Netanyahuya zəng edərək onu HƏMAS-ın o vaxtkı lideri Yəhya Sinvarın İsrailə qarşı genişmiqyaslı hücum planları barədə xəbərdar edib.

Netanyahu bildirib ki, baş nazirin ofisi, Milli Təhlükəsizlik Şurası və hərbi katiblik müvafiq dövrdə onun telefon qeydlərini yoxlayıblar, lakin belə bir söhbətə dair heç bir dəlil tapmayıblar.

7 oktyabr 2023-cü il tarixində səhər HƏMAS və digər Fələstin qruplarının silahlı üzvləri Qəzza zolağından İsrail ərazisinə hücum etdilər. Hücum nəticəsində sərhəd yaşayış məntəqələrinin sakinləri həlak oldu və təxminən 250 nəfər girov götürüldü. Hücum Qəzza zolağında uzunmüddətli hərbi əməliyyatların və sonradan regional gərginliyin artmasının başlanğıcı oldu.