BAKI, 2 aprel. TELEQRAF

Ermənistanın eyni anda həm KTMT və Avrasiya İqtisadi Birliyi (AİB), həm də Avropa İttifaqına (Aİ) üzv olması mümkün deyil.

Teleqraf xəbər verir ki, bunu İrəvanda jurnalistlərə açıqlamasında Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnik deyib.

Həmçinin onun sözlərinə görə, Rusiya başqa dövlətlərin, o cümlədən Ermənistanın daxili işlərinə qarışmaq niyyətində deyil.

Aİ və NATO-ya üzv olmaq istəyən Ukraynanı misal göstərən Miroşnik dolayı yolla Ermənistanı hədələyib:

“Ukrayna Avropa İttifaqı və NATO-ya üzv olmaq istəyini çoxdan öz konstitusiyasına daxil edib. Bəs Ukrayna bu prosesdə nə qədər irəliləyiş əldə edib? Ona görə də düşünürəm ki, siyasətçilər sırf Ermənistan xalqının maraqlarından irəli gələn müəyyən analogiyalardan nəticə çıxarmalıdırlar”.