BAKI, 29 iyun. TELEQRAF

Rusiya Prezidenti Vladimir Putin dörd ildən çoxdur çalışırdı ki, vətəndaşlar müharibənin ağırlığını hiss etməsinlər. Amma Ukrayna indi Moskvanın 2014-cü ildə ilhaq etdiyi Krımı yeni döyüş meydanına çevirib, hər gün yüzlərlə dron yarımadanın enerji və yanacaq obyektlərinə zərbələr endirir. Artıq yerli sakinlər münaqişənin təsirlərini öz üzərlərində hiss edirlər.

Teleqraf xəbər verir ki, bu barədə “The Wall Street Journal” yazıb.

Son günlərdə Krımda mütəmadi olaraq hava həyəcanı elan edilir, elektrik təchizatında fasilələr yaşanır, benzinin qiyməti isə rekord həddə çatıb. Minlərlə sakin və turist Krım körpüsü vasitəsilə yarımadanı tərk edir, Ukrayna dronlarının tətbiq etdiyi blokada faktiki olaraq Krımı Rusiyadan gələn təchizatdan təcrid edib.

“Ukraynanın hücumları Krımda həyatı alt-üst edib, Putinin Ukraynadakı imperiya ambisiyalarının simvolu hesab olunan yarımadanın imicinə ciddi zərbə vurub. Halbuki o, Krıma milyardlarla vəsait yatırmışdı. Krım sakinləri deyirlər ki, uşaq bağçaları, məişət tullantılarının daşınması və bankomatların fəaliyyəti kimi əsas xidmətlər artıq normal işləmir”, - nəşr bildirib.

Sevastopol sakinlərindən biri bildirib ki, şəhərdə artıq bir neçə gündür elektrik enerjisi yoxdur. Fövqəladə vəziyyət rejiminin tətbiqi mağazaların saat 20:00-da bağlanmasını tələb etsə də, əksəriyyəti ümumiyyətlə fəaliyyətini dayandırıb. Səbəb isə elektrik olmadığından soyudulmuş və dondurulmuş məhsulların xarab olmasıdır.

“Sevastopolda vəziyyət xüsusilə ağırdır. Mağazaların əksəriyyəti ümumiyyətlə işləmir. Nağd pul çıxarmaq mümkün deyil. İctimai nəqliyyat çox zəif və məhdud rejimdə fəaliyyət göstərir”, - o bildirib.

Krımın turizm sektoru isə ən ciddi zərbə alan sahəyə çevrilib. Rusiya Turoperatorları Assosiasiyası yayın ilk həftələrində Krıma turist rezervasiyalarının iki dəfə azaldığını, bu göstəricinin daha da pisləşə biləcəyini açıqlayıb. Buna baxmayaraq, Krıma çata bilən turistlər işlək yanacaqdoldurma məntəqələri axtarmağa və ya yanacağı qara bazardan haradan əldə edə biləcəklərini öyrənməyə məcbur qalırlar.

Moskvadan olan turist qadın avtomobilini qara bazarda tapdığı şəxs vasitəsilə hər litrini 500 rubla doldurduğunu söyləyib. Bu, orta bazar qiymətindən təxminən altı dəfə bahadır.

Vladimir Putin iyunun 28-də Krımın enerji infrastrukturunda problemlərin mövcudluğunu etiraf edib və hökumətin yanacaq və enerji çatışmazlığını quru və dəniz marşrutları ilə həyata keçiriləcək tədarüklər hesabına kompensasiya edəcəyini bildirib. O, baş verənləri “Rusiyanın mənəvi ruhunu sarsıtmağa yönəlmiş informasiya kampaniyasının bir hissəsi” kimi də qiymətləndirib. Amma Krım sakinləri hələlik yaranmış çətinliklərin öhdəsindən öz gücləri hesabına gəlməyə çalışırlar.

Yalta sakinlərindən biri isə bildirib ki, uşaq bağçasında məşğələlər dayandırıldığı üçün uşaqları ilə evdə qalmaq məqsədilə işdən çıxmalı olub. Yanacaq qıtlığı səbəbindən isə sakinlər fövqəladə hallarda fəaliyyət göstərən uşaq bağçasına belə gedə bilmirlər.