BAKI, 15 oktyabr. TELEQRAF

“Rusiya Latviyada yaşayan həmvətənlərini qorumaq və mövzu ilə bağlı beynəlxalq platformaların diqqətini çəkmək üçün bütün mövcud vasitələrindən istifadə edəcək”.

Teleqraf xəbər verir ki, bu barədə Rusiya Xarici İşlər Nazirliyinin rəsmi nümayəndəsi Maria Zaxarova brifinqdə bildirib.

“Nasizmin hədəfində olan həmvətənlərimiz dəstək alacaqlar və vətənimizin hər yerində onlara sevgi göstəriləcək. Bütün mövcud vasitələrdən istifadə edərək bu problemin beynəlxalq platformalarda diqqətə çatdırılmasını təmin edəcəyik. Əlbəttə, bu siyasəti ifşa edəcəyik. Amma bunu siyasət də adlandırmaq olmaz, bu, latış ksenofoblarının nasistliyidir”, - diplomat qeyd edib.

Latviya 13 oktyabr tarixini latış dili imtahanının son müddəti kimi müəyyən edib. Bu tarixdən sonra dili kifayət qədər bilik səviyyəsində göstərməyən Rusiya vətəndaşlarının deportasiyası qanunidir. Artıq bu əsasla 841 Rusiya vətəndaşının ölkədən çıxarıldığı bildirilir.

Qeyd edək ki, 2004-cü ildən başlayaraq Latviyada rus dilində orta məktəb sinifləri tədricən latış dilinə keçirilib. 2018-ci ildən etibarən ali məktəblər və peşə təhsili müəssisələrində tədrisin əsasən latış dilində aparılması məcburi olub. Bu, rus dilində təhsil alan şagird və tələbələrin sayını ciddi şəkildə azaldıb.

Xarici vətəndaşların Latviya vətəndaşı və ya uzunmüddətli yaşayış icazəsi alması üçün latış dili bilikləri üzrə imtahan verməsi zəruridir. Məsələn, oktyabr 13-dək imtahan verə bilməyən Rusiya vətəndaşları deportasiya olunacaq.

Dövlət orqanlarında da bütün yazışmalar latış dilində aparılır. Rusiya vətəndaşları və ya rusdilli sakinlər rəsmi müraciətlərdə latış dilindən başqa dil istifadə edə bilməzlər.

Latviya qanunvericiliyinə görə, TV, radio və media proqramlarının müəyyən hissəsi latış dilində yayımlanmalıdır. Rusdilli kanalların fəaliyyəti məhdudlaşdırılıb və reklamlarda latış dilinə üstünlük verilir.

Dövlət tədbirlərində və ictimai fəaliyyətlərdə də latış dilinə üstünlük verilir. Rusdilli məktəblər və mədəniyyət mərkəzləri fəaliyyətini davam etdirir, amma resurs və maliyyələşdirmə məhdudlaşdırılıb.

Rus dilinə qoyulan məhdudiyyətlər Latviya və Rusiya arasında gərginliyi artırıb. Deportasiya halları və dil bilikləri ilə bağlı sərt tələblər Moskvada “rusdilli əhalinin hüquqlarının məhdudlaşdırılması” kimi qiymətləndirilir.

Latviyada etnik rusların sayı təxminən 434,243 nəfərdir və bu, ölkə əhalisinin 23,4 faizini təşkil edir.